سکیورٹی فورسز کا بڑا آپریشن، 4 کمانڈرز سمیت 9 دہشتگرد ہلاک

پشاور: سکیورٹی فورسز نے شمالی وزیرستان میں انٹیلی جنس بیسڈ کارروائی کرتے ہوئے 4 کمانڈرز سمیت 9 دہشتگردوں کو ہلاک کردیا، جبکہ کرک میں نامعلوم افراد کی فائرنگ سے ایس ایچ او اور ان کا گن مین شہید ہوگئے۔

سکیورٹی ذرائع کے مطابق فورسز نے شمالی وزیرستان کے مختلف علاقوں میں فتنہ الخوارج کے خلاف انٹیلی جنس بیسڈ آپریشن کیا، جس کے دوران 4 کمانڈرز سمیت 9 دہشتگرد ہلاک ہوئے۔ ہلاک کمانڈرز میں خالد رضا، کامران، موسیٰ اور مفتوم شامل ہیں۔

ذرائع کے مطابق کارروائی کے دوران دہشتگردوں کے متعدد ٹھکانے بھی تباہ کیے گئے جبکہ ان کے قبضے سے اسلحہ اور گولہ بارود برآمد ہوا۔

دوسری جانب کرک میں باؤنڈری کے قریب نیو کڑپہ کے مقام پر نامعلوم افراد نے پولیس پر فائرنگ کردی، جس کے نتیجے میں تھانہ بانڈہ داؤد شاہ کے ایس ایچ او داؤد خان اور ان کا گن مین شہید ہوگئے جبکہ ایک راہگیر زخمی ہوا۔

ڈی پی او کرک عمران خان کے مطابق پولیس اہلکار معمول کے گشت پر تھے کہ انہیں فائرنگ کا نشانہ بنایا گیا۔ واقعے کے بعد ملزمان کی گرفتاری کے لیے علاقے میں سرچ آپریشن شروع کردیا گیا ہے۔

وزیراعظم شہباز شریف نے شمالی وزیرستان میں کارروائی کے دوران 9 دہشتگردوں کی ہلاکت پر سکیورٹی فورسز کو خراجِ تحسین پیش کرتے ہوئے کہا کہ کامیاب کارروائی فورسز کی پیشہ ورانہ صلاحیتوں کا مظہر ہے۔