مسیحیوں کو مسیحی تعلیمات پر عمل پیرا ہونے کی تلقین، ڈاکٹر جیمز سپائٹ

بشپ ڈاکٹر ایم ایم وقاص کی ملکی سلامتی، عوامی خوشحالی اور آرمی چیف جنرل عاصم منیر و مسلح افواج کے لیے خصوصی دعا

لاہور (سپیشل رپورٹر) امریکہ سے تعلق رکھنے والے معروف مذہبی رہنما ڈاکٹر جیمز سپائٹ نے بدھ کے روز ون اِن کرائسٹ فیملی چرچ نیو گرین ٹاؤن کا دورہ کیا۔ ان کے ہمراہ ان کی سیکرٹری و مبشر ایونجیلسٹ جوائس عامر بھی تھیں۔ چرچ آمد پر بشپ ڈاکٹر ایم ایم وقاص اور دیگر پادری صاحبان نے معزز مہمانوں کا پرتپاک استقبال کیا۔ اس موقع پر منعقدہ خصوصی اجتماع سے خطاب کرتے ہوئے ڈاکٹر جیمز سپائٹ نے مسیحی برادری پر زور دیا کہ وہ مسیحی تعلیمات کو اپنی عملی زندگی کا حصہ بنائیں اور محبت، خدمت، معافی، برداشت اور انسانیت کے پیغام کو عام کریں۔ انہوں نے کہا کہ مسیحیوں کی ذمہ داری ہے کہ وہ اپنے کردار اور عمل کے ذریعے معاشرے میں امن، محبت اور بھائی چارے کو فروغ دیں۔
اس موقع پر بشپ ڈاکٹر ایم ایم وقاص نے خصوصی دعا کرائی، جس میں پاکستان کی سالمیت، استحکام، امن و سلامتی اور عوام کی فلاح و بہبود کے لیے دعا کی گئی۔ انہوں نے ملک کے حکمرانوں، چیف آف آرمی اسٹاف جنرل عاصم منیر اور پاک فوج سمیت تمام مسلح افواج کی سلامتی، کامیابی اور ملک و قوم کے تحفظ کے لیے بھی خصوصی دعا کی۔
بشپ ڈاکٹر ایم ایم وقاص نے کہا کہ پاکستان ہمارا وطن ہے اور ملک کی ترقی، استحکام اور سلامتی کے لیے تمام شہریوں کو اپنا کردار ادا کرنا چاہیے۔ انہوں نے کہا کہ مسیحی برادری ملک کی سلامتی، خوشحالی اور امن کے لیے ہمیشہ دعا کرتی رہے گی۔