زرعی انکم ٹیکس کی وصولی اور مقررہ اہداف ہر صورت مکمل کیے جائیں، ماجد سلیم

مسلم باغ (پ ر): اسسٹنٹ کمشنر مسلم باغ ماجد سلیم کی زیرِ صدارت، ڈپٹی کمشنر قلعہ سیف اللہ کی ہدایت پر ریونیو اجلاس منعقد ہوا، جس میں زرعی انکم ٹیکس کے بقایاجات کی وصولی اور مقررہ اہداف کے حصول کا تفصیلی جائزہ لیا گیا۔

اجلاس میں تحصیلدار، نائب تحصیلدار، گرداور، پٹواری اور دیگر متعلقہ ریونیو عملے نے شرکت کی۔ متعلقہ اہلکاروں نے اپنے اپنے حلقوں میں زرعی انکم ٹیکس کی وصولی کی موجودہ صورتحال اور پیش رفت سے آگاہ کیا۔

اس موقع پر اسسٹنٹ کمشنر ماجد سلیم نے ہدایت کی کہ زرعی انکم ٹیکس کے بقایاجات کی وصولی مقررہ مدت میں یقینی بنائی جائے اور اہداف کے حصول کے لیے مؤثر اقدامات کیے جائیں۔ انہوں نے واضح کیا کہ سرکاری محصولات کی وصولی میں غفلت یا کوتاہی برداشت نہیں کی جائے گی۔

انہوں نے مزید ہدایت کی کہ بقایاجات رکھنے والے افراد سے بروقت رابطہ کیا جائے، ریکارڈ کو مکمل اور اپ ڈیٹ رکھا جائے اور وصولی کی پیش رفت سے باقاعدگی سے آگاہ کیا جائے۔