تحصیل آفس گنداخہ عوامی سہولیات کیلئے دوبارہ فعال کردیا گیا

گنداخہ:( نامہ نگار فریداحمد) چیف سردار محمد ہارون خان جمالی اور صوبائی وزیر لائیو اسٹاک سردارزادہ فیصل خان جمالی کی خصوصی کاوشوں سے تحصیل آفس گنداخہ کو عوامی سہولیات کی فراہمی کے لیے دوبارہ فعال کردیا گیا ہے،جس پر شہریوں اور عوامی حلقوں نے اطمینان کا اظہار کرتے ہوئے چیف سردار محمد ہارون خان جمالی اور صوبائی وزیر سردارزادہ فیصل خان جمالی کو خراجِ تحسین پیش کیا ہے۔عوامی حلقوں کے مطابق تحصیل آفس گنداخہ کی فعالیت سے تحصیل گنداخہ کے عوام کو مختلف سرکاری امور کی انجام دہی کے لیے بار بار اوستا محمد جانے کی زحمت سے نجات ملے گی۔ تحصیل آفس میں متعلقہ عملہ اپنی ذمہ داریاں انجام دے گا، جس سے عوام کو ان کی دہلیز پر سرکاری خدمات کی فراہمی، وقت اور اخراجات کی بچت ممکن ہوگی۔انہوں نے کہا کہ تحصیل آفس گنداخہ کی بحالی ایک اہم عوامی اور انتظامی پیش رفت ہے، جس سے مقامی سطح پر سرکاری امور کی انجام دہی میں آسانی پیدا ہوگی اور شہریوں کو ریلیف ملے گا۔ عوامی حلقوں نے کہا کہ سردار محمد ہارون خان جمالی اور صوبائی وزیر لائیو اسٹاک سردارزادہ فیصل خان جمالی کی جانب سے علاقے کے عوامی مسائل کے حل اور بنیادی سہولیات کی فراہمی کے لیے کی جانے والی کاوشیں قابلِ تحسین ہیں۔انہوں نے مزید کہا کہ سردار گھرانے کی عوامی خدمت اور عوامی سہولیات کی فراہمی کے لیے اقدامات کسی سے ڈھکے چھپے نہیں، انہوں نے ہمیشہ علاقے کے عوام کے مسائل کے حل، سرکاری اداروں کی فعالیت اور عوام کو زیادہ سے زیادہ سہولیات کی فراہمی کے لیے اپنا کردار ادا کیا ہے۔ عوام نے امید ظاہر کی کہ تحصیل آفس گنداخہ کی بحالی کے بعد شہریوں کو سرکاری امور میں مزید آسانی اور فوری ریلیف حاصل ہوگا۔