مری آباد میں واسا ٹینک میں گر کر 4 سالہ بچی جاں بحق

مرکزی تنظیم تاجران بلوچستان کے ترجمان کاشف حیدری نے مری آباد کوئٹہ میں واسا کے ٹینک میں گر کر 4 سالہ معصوم بچی کے جاں بحق ہونے پر گہرے دکھ اور افسوس کا اظہار کیا ہے۔

کاشف حیدری نے کہا کہ معصوم بچی کی زندگی کا ضیاع انتہائی افسوسناک اور دل دہلا دینے والا واقعہ ہے، جس سے متعلقہ اداروں کی کارکردگی اور شہریوں کے جان و مال کے تحفظ کے حوالے سے کئی سوالات پیدا ہوتے ہیں۔

انہوں نے کہا کہ متعلقہ حکام کی ذمہ داری ہے کہ شہریوں کی حفاظت کو یقینی بنائیں اور خطرناک مقامات، خصوصاً کھلے ٹینکوں اور دیگر خطرناک تنصیبات کو محفوظ بنایا جائے۔

ترجمان نے انتظامیہ اور متعلقہ اداروں سے مطالبہ کیا کہ واقعے کا فوری نوٹس لے کر ذمہ داروں کا تعین کیا جائے اور کوئٹہ بھر میں موجود خطرناک مقامات کو محفوظ بنانے کے لیے فوری اقدامات کیے جائیں، تاکہ مستقبل میں کسی اور گھر کا چراغ اس طرح نہ بجھے۔

کاشف حیدری نے سوگوار خاندان سے دلی تعزیت کرتے ہوئے دعا کی کہ اللہ تعالیٰ انہیں یہ صدمہ صبر و حوصلے کے ساتھ برداشت کرنے کی توفیق عطا فرمائے۔ آمین۔