ایوارڈ سیاسی قربانیوں اور عوامی خدمت کرنے والی شخصیات کو دیا جائیگا، جمال شاہ کاکڑ

کوئٹہ (پ ر) گورنر ہاوس کوئٹہ میں مسلم لیگ ن بلوچستان کی جانب سے ایک تقریب کا انعقاد کیا گیا، جس میں ”انٹرنیشنل ریئل ڈیموکریٹک میاں محمد نواز شریف انٹرنیشنل سول ایوارڈ“ کی بنیاد رکھنے کا اعلان کیا گیا۔تقریب سے خطاب کرتے ہوئے مسلم لیگ ن بلوچستان کے جنرل سیکرٹری جمال شاہ کاکڑ نے کہا کہ جمہوریت صرف انتخابات کا نام نہیں بلکہ ایک سوچ، رویہ اور مسلسل جدوجہد ہے۔ ان کے مطابق جمہوریت عوام کے حقِ انتخاب، آئین کی بالادستی، پارلیمان کے احترام، سیاسی اختلاف کو برداشت کرنے اور ووٹ کے فیصلے کو تسلیم کرنے کا نام ہے۔جمال شاہ کاکڑ نے کہا کہ یہ ایوارڈ مسلم لیگ ن کے قائد میاں محمد نواز شریف کے نام سے منسوب کیا گیا ہے۔ انہوں نے اعلان کیا کہ یہ انٹرنیشنل سول ایوارڈ ہر سال پاکستان سمیت دنیا بھر کی ان شخصیات کو دیا جائے گا جنہوں نے پارلیمنٹ کے احترام، ووٹ کو عزت دینے اور جمہوریت کی سربلندی کے لیے سیاسی خدمات اور قربانیاں دی ہوں، جبکہ عوامی خدمت اور بہتر کارکردگی میں نمایاں کردار ادا کرنے والی شخصیات بھی اس اعزاز کی حقدار ہوں گی۔انہوں نے کہا کہ ایوارڈ کے ذریعے جمہوری اقدار، عوامی خدمت اور پارلیمانی نظام کے لیے خدمات انجام دینے والی شخصیات کی حوصلہ افزائی کی جائے گی۔تقریب کے اختتام پر جمال شاہ کاکڑ نے شعری کلام پیش کیا اور ”پاکستان زندہ باد، بلوچستان پائندہ باد“ کے نعرے کے ساتھ تقریب اختتام پذیر ہوئی۔