ٹانک، ٹریفک پولیس کی موبائل گاڑی پر فائرنگ، 3اہلکار شہید

ٹانک کے علاقے وزیر آباد میں ٹریفک پولیس کی موبائل گاڑی پر فائرنگ کے نتیجے میں 3 اہلکار شہید ہوگئے۔

تھانہ سٹی پولیس کے مطابق موٹر سائیکل سوار مسلح حملہ آوروں نے ٹریفک پولیس کی موبائل گاڑی کو نشانہ بنایا اور فائرنگ کے بعد فرار ہوگئے۔

واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر حملہ آوروں کی تلاش شروع کردی۔ شہید اہلکاروں کی لاشیں اسپتال منتقل کردی گئی ہیں۔

پولیس کے مطابق واقعے کی تحقیقات جاری ہیں جبکہ فرار ہونے والے حملہ آوروں کی گرفتاری کے لیے سرچ کارروائی کی جارہی ہے۔