سردار عبید گورگیج کی عوامی خدمات قابلِ تحسین ہیں،میر شیر احمد بنگلزئی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کوئٹہ: پاکستان پیپلز پارٹی بلوچستان کے رہنما اور حلقہ پی بی 44 معائنہ کمیٹی کے رکن میر شیر احمد بنگلزئی نے رکن صوبائی اسمبلی حلقہ پی بی 44 سردار عبیداللہ گورگیج کی بہترین عوامی خدمات کو خراج تحسین پیش کرتے ہوئے کہا ہے کہ سردار عبیداللہ گورگیج نے اپنے حلقے کے عوام کے مسائل کے حل اور بنیادی سہولیات کی فراہمی کیلئے بھرپور کردار ادا کیا ہے، ان کی عوامی خدمات قابلِ قدر اور قابلِ تحسین ہیں۔ انہوں نے کہا کہ سردار عبیداللہ گورگیج عوام سے مسلسل رابطے میں رہتے ہوئے ان کے مسائل کو ترجیحی بنیادوں پر حل کرانے کیلئے کوشاں ہیں، جبکہ حلقہ پی بی 44 میں ترقیاتی عمل اور عوامی فلاح و بہبود کے حوالے سے ان کی کاوشیں نمایاں ہیں۔ انہوں نے کہا کہ عوامی نمائندوں کی کارکردگی کو مدنظر رکھتے ہوئے انہیں صوبائی سطح پر مزید ذمہ داریاں دی جانی چاہئیں۔ میر شیر احمد بنگلزئی نے وزیراعلیٰ بلوچستان میر سرفراز بگٹی سے مطالبہ کیا کہ سردار عبیداللہ گورگیج کو صوبائی کابینہ میں شامل کیا جائے تاکہ وہ اپنی صلاحیتوں اور تجربے کو صوبے کی مجموعی ترقی، عوامی مسائل کے حل اور بلوچستان کے عوام کی خدمت کیلئے مزید مؤثر انداز میں بروئے کار لاسکیں۔انہوں نے کہا کہ پاکستان پیپلز پارٹی عوامی خدمت، جمہوری اقدار اور بلوچستان کی ترقی کے مشن پر گامزن ہے اور پارٹی کے مخلص و متحرک نمائندوں کی حوصلہ افزائی سے عوامی خدمت کے عمل کو مزید تقویت ملے گی۔