سہیل آفریدی کے دفاع میں بیرسٹر گوہر میدان میں آگئے، اہم وضاحت کردی

اسلام آباد: چیئرمین پاکستان تحریک انصاف (پی ٹی آئی) بیرسٹر گوہر نے وزیراعلیٰ خیبر پختونخوا سہیل آفریدی کو عہدے سے ہٹانے کی خبروں کی تردید کر دی۔

چیئرمین پی ٹی آئی بیرسٹر گوہر نے اپنے ایک بیان میں کہا کہ بانی پی ٹی آئی عمران خان نے سہیل آفریدی کے خلاف کوئی پیغام نہیں بھیجا اور نہ ہی انہیں عہدے سے ہٹانے کی ہدایت کی ہے۔

انہوں نے کہا کہ وزیراعلیٰ خیبر پختونخوا سہیل خان آفریدی کو بانی پی ٹی آئی کا مکمل اعتماد حاصل ہے اور پی ٹی آئی بھی ان کی مکمل حمایت کرے گی۔

بیرسٹر گوہر نے واضح کیا کہ سب کو سمجھنا ہو گا کہ یہ حالات کو مزید خراب کرنے کا وقت نہیں، اس وقت سب کو ملک کے حالات بہتر بنانے کی کوشش کرنی چاہیے۔

انہوں نے کہا کہ صورتحال کو مزید خراب ہونے سے بچانے کے لیے کوششیں کی جا رہی ہیں۔

خیبر پختونخوا کے وزیر اطلاعات شفیع جان نے بھی سماجی رابطے کی ویب سائٹ ایکس پر سہیل آفریدی کے خلاف چلنے والی خبروں کی تردید کرتے ہوئے کہا کہ وزیراعلیٰ سہیل آفریدی کے خلاف عدم اعتماد سے متعلق چلنے والی خبر جھوٹ، بے بنیاد اور من گھڑت ہے، جو اُن کے خلاف جاری پروپیگنڈے کا ہی ایک تسلسل ہے۔

انہوں نے کہا کہ اپنی خواہشات کو “ذرائع” کے نام سے پیش کرنے والے سن لیں، سہیل آفریدی کہیں نہیں جا رہے، وہ 4 اکتوبر 2026 کو اسلام آباد کی جانب آ رہے ہیں، تاریخ یاد رکھیں۔

شفیع جان نے ٹوئٹ کے آخر میں یہ شعر لکھا کہ ہزاروں خواہشیں ایسی کہ ہر خواہش پہ دم نکلے۔