زیارت کراس پر مسلح افراد کا حملہ، فائرنگ کے بعد کسٹم ویئر ہاؤس میں آتشزدگی، 5 اہلکار جاں بحق

کوئٹہ: پشین کے علاقے زیارت کراس پر رات گئے مسلح افراد نے پولیس چوکی اور کسٹم ویئر ہاؤس کو نشانہ بنایا، جس کے بعد سیکیورٹی فورسز اور حملہ آوروں کے درمیان شدید فائرنگ کا تبادلہ ہوا۔

پولیس ذرائع کے مطابق مسلح افراد نے زیارت کراس پر قائم پولیس چوکی اور کسٹم ویئر ہاؤس پر حملہ کیا۔ فائرنگ کے دوران متعدد سیکیورٹی اہلکار زخمی ہوئے جبکہ ابتدائی اطلاعات کے مطابق 5 اہلکار جاں بحق ہوگئے۔

ذرائع کا کہنا ہے کہ فائرنگ کا سلسلہ رکنے کے بعد مسلح افراد نے کسٹم ویئر ہاؤس میں کھڑی گاڑیوں کو آگ لگا دی، جس سے وہاں موجود متعدد گاڑیاں لپیٹ میں آگئیں۔

آتشزدگی کی اطلاع ملنے پر پی ڈی ایم اے کی ریسکیو ٹیمیں فوری طور پر موقع پر پہنچ گئیں اور گاڑیوں میں لگی آگ پر قابو پالیا گیا۔ حکام کے مطابق کولنگ کا عمل جاری ہے، جبکہ پی ڈی ایم اے کی 12 ایمبولینسیں بھی جائے وقوعہ پر موجود ہیں۔

پولیس ذرائع کے مطابق جاں بحق اہلکاروں کی لاشوں اور زخمیوں کو طبی امداد کے لیے اسپتال منتقل کیا جا رہا ہے۔

واقعے کے بعد علاقے کو سیکیورٹی فورسز نے گھیرے میں لے لیا ہے جبکہ کلیئرنس آپریشن بھی جاری ہے۔ واقعے سے متعلق مزید تفصیلات سیکیورٹی حکام کی جانب سے فراہم کی جائیں گی۔