مکہ دفاعی معاہدہ: استنبول میں پاکستان، سعودیہ اور ترک قیادت کے درمیان پہلا اجلاس

استنبول: مکہ مشترکہ دفاعی معاہدے کے تحت اسٹریٹجک سیاسی و دفاعی کمیٹی کا پہلا اجلاس ترکیہ کی میزبانی میں استنبول میں منعقد ہوا، جس میں پاکستان، سعودی عرب اور ترکیہ کی قیادت نے علاقائی و عالمی سلامتی اور دفاعی تعاون سے متعلق امور پر تبادلہ خیال کیا۔

اجلاس میں تینوں ممالک کی مسلح افواج کے درمیان تعاون اور ہم آہنگی بڑھانے، دفاعی صنعت میں مشترکہ پیداوار، تحقیق و ترقی اور دہشت گردی کے خلاف مشترکہ کوششوں کو مزید مؤثر بنانے کے امور زیرِ غور آئے۔

اجلاس کے بعد ترک وزیر خارجہ ہاکان فیدان نے میڈیا بریفنگ میں کہا کہ مکہ معاہدہ دفاع کے اصول پر مبنی ایک تاریخی اقدام ہے، جس کا مقصد علاقائی امن اور استحکام کو فروغ دینا ہے۔

انہوں نے کہا کہ اجلاس میں اتحاد کا عملی ڈھانچہ قائم کرنے کی جانب پیش رفت ہوئی ہے اور معاہدے کو باضابطہ طور پر ’’مکہ معاہدہ‘‘ کا نام دینے پر اتفاق کیا گیا ہے۔

ہاکان فیدان کے مطابق خطے میں امن کے لیے تمام علاقائی ممالک کو مل کر اقدامات کرنا ہوں گے۔ دیگر ممالک کو بھی مقررہ شرائط کے تحت معاہدے میں شامل کیا جاسکتا ہے، جبکہ ان کی شمولیت کے روڈ میپ پر کام جاری ہے۔

ترک وزیر خارجہ نے واضح کیا کہ یہ اتحاد کسی مخصوص ریاست کے خلاف نہیں بلکہ عالمی قوانین کے مطابق قائم کیا جارہا ہے۔ ان کا کہنا تھا کہ مکہ معاہدہ نیٹو کی تکمیل کرتا ہے اور تینوں ممالک نے اتحاد کا ڈھانچہ قائم کرنا شروع کردیا ہے۔