عالمی ثالثی عدالت کا بھارت کو پاکستان کے ساتھ سندھ طاس معاہدے کی پاس داری کا حکم

اسلام آباد: عالمی مستقل ثالثی عدالت نے سندھ طاس معاہدے سے متعلق پاکستان کے مؤقف کی تائید کرتے ہوئے بھارت کی جانب سے معاہدے کو یک طرفہ طور پر معطل رکھنے کے اقدام کو مسترد کردیا۔

نیدرلینڈز کے شہر دی ہیگ میں اقوام متحدہ کے منشور کے تحت قائم عالمی مستقل ثالثی عدالت نے اپنے متفقہ فیصلے میں قرار دیا کہ بھارت کی جانب سے پیش کی گئی کوئی بھی وجہ سندھ طاس معاہدے کی معطلی یا خاتمے کا جواز فراہم نہیں کرتی۔

عدالت کے مطابق بھارت یک طرفہ طور پر سندھ طاس معاہدے کو معطل یا ختم نہیں کرسکتا اور معاہدے کے تحت بھارت کی ذمہ داریاں بدستور برقرار ہیں۔

فیصلے میں واضح کیا گیا کہ معاہدے کی قانونی حیثیت برقرار ہے اور کسی ایک فریق کی جانب سے یک طرفہ اقدام اس کی ذمہ داریوں کو ختم نہیں کرسکتا۔

عالمی ثالثی عدالت کے اس فیصلے کو پاکستان کے مؤقف اور بین الاقوامی قانون کے حوالے سے اہم پیش رفت قرار دیا جا رہا ہے۔

ماہرین کے مطابق فیصلے سے سندھ طاس معاہدے کی قانونی حیثیت مزید واضح ہوگئی ہے اور بھارت کی جانب سے اسے یک طرفہ طور پر معطل رکھنے کے مؤقف کو تقویت نہیں ملتی۔