گوجرانوالہ: وزیر داخلہ کا نادرا میگا سینٹر میں پاسپورٹ آفس کی سہولت بھی مہیا کرنے کا اعلان

گوجرانوالہ: وفاقی وزیر داخلہ محسن نقوی نے گوجرانوالہ کے 24 گھنٹے فعال میگا نادرا سنٹر کا دورہ کیا اور اعلان کیا کہ شہریوں کی سہولت کے لیے بہت جلد اسی مرکز میں پاسپورٹ آفس کی سہولت بھی فراہم کی جائے گی۔

محسن نقوی نے نادرا سنٹر میں شناختی کارڈ اور دیگر دستاویزات بنوانے کے لیے آنے والے شہریوں سے ملاقات کی اور انہیں فراہم کی جانے والی سہولیات کے بارے میں دریافت کیا۔

وفاقی وزیر داخلہ نے مختلف کاؤنٹرز، انفارمیشن ڈیسک اور عملے کی کارکردگی کا جائزہ لیا۔ انہوں نے شہریوں کی بعض شکایات کا موقع پر ہی نوٹس لیتے ہوئے ان کے فوری ازالے کے احکامات بھی جاری کیے۔

محسن نقوی نے کہا کہ نادرا میگا سنٹر آنے والے شہریوں کی ہر ممکن رہنمائی کی جائے اور انہیں تمام ضروری معلومات فراہم کی جائیں۔ انہوں نے عملے کی کارکردگی کو سراہتے ہوئے کہا کہ شہریوں کو اپنے کام کے لیے بار بار نادرا سنٹر کے چکر نہیں لگانے چاہئیں۔

شہریوں نے بھی میگا سنٹر میں فراہم کی جانے والی سہولیات پر اطمینان کا اظہار کرتے ہوئے کہا کہ یہاں کام جلد ہو جاتا ہے اور زیادہ انتظار نہیں کرنا پڑتا۔