امریکا خلا میں بھی ایران مخالف اتحاد بنا رہا ہے، اسماعیل بقائی

امریکا خلا میں بھی ایران مخالف اتحاد بنا رہا ہے، اسماعیل بقائی

بحرین کو آگے لا کر امریکی پابندیوں کی مہم کامیاب دکھانے کی کوشش ناکام ہے، ترجمان ایرانی وزارت خارجہ

تہران: ایران کی وزارت خارجہ کے ترجمان اسماعیل بقائی نے امریکا کی جانب سے ایران کو معاشی طور پر تنہا کرنے کی کوششوں پر تنقید کرتے ہوئے کہا ہے کہ واشنگٹن کی ایران مخالف پالیسی اب ایک مذاق بن چکی ہے۔

اسماعیل بقائی نے سوشل میڈیا پلیٹ فارم ایکس پر بیان میں کہا کہ امریکا بحرین جیسے ممالک کو آگے لاکر اپنی اتحادی مہم کو کامیاب ثابت کرنے کی ناکام کوشش کر رہا ہے۔

انہوں نے کہا کہ بحرین کے ساتھ ایران کے پہلے ہی کوئی قابلِ ذکر معاشی تعلقات نہیں، جبکہ کھیلوں اور تعلیمی تبادلے بھی کئی سال سے عملی طور پر معطل ہیں۔ ان کے بقول امریکا پہلے سے معطل معاملات کو روکنے کو نئی پابندیوں کے طور پر پیش کر رہا ہے۔

ایرانی ترجمان نے امریکی پالیسی کو بےجواز قرار دیتے ہوئے کہا کہ واشنگٹن ایسی پابندیوں کا اعلان کر رہا ہے جو پہلے ہی نافذ ہیں۔ انہوں نے طنزیہ انداز میں کہا کہ امریکا خلا میں بھی ایران مخالف اتحاد بنانے کی کوشش کر رہا ہے۔

اسماعیل بقائی کا کہنا تھا کہ ایران امریکی اقتصادی پابندیوں کا مقابلہ کرنے کیلئے اپنے دستیاب دوطرفہ ذرائع اور صلاحیتیں استعمال کرے گا اور اقتصادی دباؤ کے باوجود تجارتی تعلقات برقرار رکھنے کی کوشش جاری رکھے گا۔

واضح رہے کہ امریکی وزیر خزانہ اسکاٹ بیسنٹ نے بحرینی وزیر خزانہ شیخ سلمان بن خلیفہ آل خلیفہ سے رابطے کی تصدیق کرتے ہوئے ایران پر مالی دباؤ برقرار رکھنے کے حوالے سے بات چیت کی تھی۔