عمران خان کی ایک آنکھ نارمل ہوچکی، جیل ملاقاتوں اور صحت سے متعلق رپورٹ سپریم کورٹ میں جمع

اسلام آباد: بانی پی ٹی آئی عمران خان کی صحت اور جیل میں ملاقاتوں سے متعلق رپورٹ سپریم کورٹ میں جمع کرا دی گئی، جس کے مطابق ان کی ایک آنکھ تقریباً نارمل ہوچکی ہے جبکہ اہلیہ سے ہر منگل کو ملاقات کرائی جاتی ہے۔

اڈیالہ جیل کے سپرنٹنڈنٹ کی جانب سے جمع کرائی گئی دو صفحات کی رپورٹ کے ساتھ 24 صفحات پر مشتمل اخباری تراشے اور ڈاکٹروں کی جانب سے کیے گئے طبی معائنے کی تفصیلات بھی شامل ہیں۔

رپورٹ کے مطابق عمران خان اور ان کی اہلیہ کی جیل رولز کے تحت ہر منگل کو باقاعدگی سے ملاقات ہوتی ہے اور اب تک 84 ملاقاتیں ہوچکی ہیں۔

رپورٹ میں بتایا گیا کہ عمران خان کے کھانے پینے کی دن میں تین مرتبہ جانچ اور طبی معائنہ کیا جاتا ہے، جبکہ متعدد سرکاری معالجین بھی ان کا چیک اپ کرچکے ہیں۔

رپورٹ کے مطابق ماہر امراضِ چشم سے عمران خان کی آنکھ کا علاج بھی کرایا جاتا رہا ہے اور ایک آنکھ تقریباً نارمل ہوچکی ہے۔ 4 نومبر 2023 سے 10 اگست 2026 تک 39 مختلف طبی ماہرین کے معائنے کی سمری بھی رپورٹ کا حصہ ہے۔

رپورٹ میں سپریم کورٹ سے مقدمہ نمٹانے کی استدعا کی گئی ہے، جبکہ سلمان اکرم راجہ کی جانب سے ہائیکورٹ میں دی گئی یقین دہانی کا بھی حوالہ دیا گیا ہے کہ ملاقات کے بعد جیل احاطے میں میڈیا سے گفتگو نہیں کی جائے گی۔ رپورٹ میں عدالتی حکم کے باوجود میڈیا ٹاک کرنے کو حکم کی خلاف ورزی قرار دیا گیا ہے۔