وزیراعظم نے ملک کی پہلی نیشنل یوتھ پالیسی کا اعلان کردیا

اسلام آباد: وزیراعظم شہباز شریف نے ملک کی پہلی نیشنل یوتھ پالیسی کا اعلان کرتے ہوئے کہا ہے کہ نوجوانوں کو روزگار، تعلیم اور کاروباری مواقع فراہم کیے جائیں گے۔

نوجوانوں کے عالمی دن کے موقع پر تقریب سے خطاب کرتے ہوئے وزیراعظم نے کہا کہ لیبر فورس میں خواتین کے لیے 35 فیصد کوٹا مختص کیا جائے گا، جبکہ نوجوانوں کو اسٹارٹ اپس کے لیے سہولیات اور معاونت فراہم کی جائے گی۔

وزیراعظم نے آئی ٹی اور مصنوعی ذہانت کی تعلیم کے لیے ایک ہزار طلبہ کو سرکاری خرچ پر چین بھیجنے کا اعلان بھی کیا، جبکہ مزید ڈھائی لاکھ طلبہ کو کروم بکس فراہم کرنے کا کہا۔

انہوں نے کہا کہ دانش یونیورسٹی میں جدید اور ٹیکنیکل تعلیم پر توجہ دی جائے گی، جبکہ نوجوان نسل ہی 2047 کے پاکستان کی تعمیر کرے گی۔