محسن نقوی کی ایرانی صدر سے ملاقات، وزیراعظم، فیلڈ مارشل کا اہم پیغام پہنچایا

محسن نقوی کی ایرانی صدر سے ملاقات، وزیراعظم، فیلڈ مارشل کا اہم پیغام پہنچایا

وفاقی وزیرداخلہ محسن نقوی نے تہران میں ایرانی صدر مسعود پزشکیان سے ملاقات کی، جس میں دوطرفہ تعلقات اور خطے کی صورتحال پر تبادلہ خیال کیا گیا۔
ذرائع کے مطابق محسن نقوی نے موجودہ صورتحال کے حوالے سے ایرانی صدر مسعود پزشکیان کو وزیراعظم شہباز شریف اور فیلڈ مارشل سید عاصم منیر کا خصوصی اور اہم پیغام پہنچایا۔

ذرائع ایرانی میڈیا کے مطابق وزیر داخلہ نے ایرانی صدر کو پاکستان، سعودی عرب اور ترکیہ کے مابین حالیہ مکہ مشترکہ دفاعی معاہدہ کے بارے بریف کیا، محسن نقوی نے معاہدہ کے حوالے سے ایرانی صدر مسعود پزشکیان کو اعتماد میں لیا۔

ذرائع ایرانی میڈیا کے مطابق فیلڈ مارشل سید عاصم منیر خلیجی ممالک، ایران اور امریکہ کے اعلی حکام کے ساتھ تسلسل کے ساتھ رابطے میں ہیں، فیلڈ مارشل خطے میں امن مذاکرات کو لیڈ کر رہے ہیں، جبکہ وفاقی وزیرداخلہ محسن نقوی فیلڈ مارل کی معاونت کر رہے ہیں۔

قبل ازیں ایران کے صدر مسعود پزشکیان نے وزیر داخلہ محسن نقوی سے ملاقات کے بعد گفتگو کرتے ہوئے کہا کہ پاکستان کے ساتھ مشترکہ تعاون کی راہ ہموار کرنے کیلئے تیار ہیں، دوطرفہ تعلقات بڑھانےسے باہمی مفادات یقینی،علاقائی سکیورٹی و استحکام مضبوط ہوگا۔

انہوں نے کہا کہ پاکستان کے ساتھ مضبوط تعلقات علاقائی سکیورٹی میں اضافہ کا سبب بن سکتے ہیں۔

ایرانی صدرمسعود پزشکیان نے کہا کہ ایران سے تعلقات بڑھانے اور انہیں مضبوط کرنے سے متعلق وزیراعظم شہبازشریف اور دیگر پاکستانی حکام کی محبت اور دلچسپی ایران کیلئے انتہائی قابل قدر ہے، ایران تمام شعبوں میں پاکستان سے تعلقات بڑھانے میں دلچسپی رکھتا ہے اور مشترکہ تعاون کی راہ ہموار کرنے کیلئے تیار ہے۔

انہوں نے کہا کہ دوطرفہ تعلقات بڑھانے اورتعاون گہرا کرنے سے باہمی مفادات یقینی ہوں گے اور علاقائی سکیورٹی و استحکام بھی مضبوط ہوگا۔

وزیر داخلہ محسن نقوی نے کہا کہ ایران اورپاکستان کے تعلقات مضبوط اور نہ ٹوٹنے والے ہیں۔تہران سے تعلقات کو جامع انداز سے بڑھانے کیلئے اسلام آباد انتہائی سنجیدہ عزم کےساتھ اقدامات کررہاہے۔

اس سے قبل وزیر داخلہ محسن نقوی نے ایرانی وزیرخارجہ عباس عراقچی سے ملاقات کی، جس میں خطے کی صورتحال پر تبادلہ خیال کیا گیا۔