عمران خان کو جیل میں کون سی کتابیں فراہم کی گئیں؟ رپورٹ سامنے آگئی

اسلام آباد: بانی پی ٹی آئی عمران خان کو جیل میں فراہم کی گئی کتابوں سے متعلق رپورٹ اسلام آباد ہائیکورٹ میں جمع کرا دی گئی ہے، جس میں بتایا گیا ہے کہ عدالت کی ہدایت پر جیل حکام نے انہیں 8 کتابیں فراہم کیں۔

رپورٹ کے مطابق عمران خان نے 8 میں سے 4 کتابیں یہ کہہ کر واپس کردیں کہ وہ انہیں پہلے ہی پڑھ چکے ہیں، جبکہ 4 کتابیں اپنے پاس رکھ لیں۔

جیل حکام کی جانب سے فراہم کی گئی کتابوں میں ’’اسلام میں مذہبی فکر کی تشکیل نو‘‘، ’’نماز، سنت کے مطابق‘‘، ’’سلطان صلاح الدین ایوبی‘‘، ’’حضرت محمد ﷺ کے بارے میں غلط بیانی‘‘، ’’نئی مملکت، نئی ریاست‘‘، ’’اقبال اور مشرق کے ادوار‘‘، ’’اسلام میں فن اور سائنس سولائزیشن‘‘ اور ’’حضرت محمد ﷺ بطور ملٹری لیڈر اور کمانڈر‘‘ شامل تھیں۔

رپورٹ کے مطابق عمران خان نے اپنے پاس ’’نئی ریاست‘‘، ’’اقبال اور مشرق کے ادوار‘‘، ’’اسلام میں فن اور سائنس‘‘ اور ’’حضرت محمد ﷺ بطور ملٹری لیڈر اور کمانڈر‘‘ رکھیں، جبکہ باقی چار کتابیں واپس کردی گئیں۔

یہ رپورٹ اسلام آباد ہائیکورٹ میں جیل کے ڈپٹی سپرنٹنڈنٹ کی جانب سے جمع کرائی گئی۔