پنجگور میں سیکیورٹی فورسز کا آپریشن، 5 دہشت گرد ہلاک

پنجگور: سیکیورٹی فورسز نے آپریشن ردالفتنہ 3 کے تحت بلوچستان میں دہشت گرد عناصر کے خلاف کارروائی کرتے ہوئے پنجگور کے علاقے سرکینی اور چھیدگی میں 5 دہشت گردوں کو ہلاک کردیا۔

سیکیورٹی ذرائع کے مطابق خفیہ اطلاع ملنے پر سرکینی اور چھیدگی میں انٹیلی جنس بیسڈ آپریشن کیا گیا، جس کے دوران فتنہ الہندوستان سے تعلق رکھنے والے اہم سرغنہ وزیر ولد جمال سمیت 5 دہشت گرد مارے گئے۔

ذرائع کا کہنا ہے کہ کارروائی کے دوران دہشت گردوں کے قبضے سے 4 موٹر سائیکلیں، مشین گنز، بھاری اسلحہ اور بڑی مقدار میں گولہ بارود بھی برآمد کیا گیا۔

سیکیورٹی ذرائع کے مطابق ہلاک دہشت گرد پنجگور میں مقامی تاجروں اور شہریوں سے مبینہ لوٹ مار، بھتہ خوری، اغوا اور دیگر دہشت گردانہ سرگرمیوں میں ملوث تھے۔

کارروائی کے بعد علاقے میں ممکنہ طور پر موجود دیگر دہشت گردوں کی تلاش اور مکمل صفائی کے لیے کلیئرنس آپریشن جاری ہے۔

سیکیورٹی فورسز نے بلوچستان سے دہشت گرد عناصر کے خاتمے اور صوبے میں امن و امان کے قیام کے لیے کارروائیاں جاری رکھنے کے عزم کا اظہار کیا ہے۔