کاریزات کو ضلع بنانے پر جامع سفارشات تیار ہوں گی، میر ضیاء اللہ لانگو

کوئٹہ میں کاریزات کو ضلع کا درجہ دینے سے متعلق حکومتی کمیٹی کا ایک اہم اجلاس وزیر داخلہ بلوچستان اور چیئرمین کمیٹی میر ضیاء اللہ لانگو کی زیر صدارت منعقد ہوا۔ اجلاس میں پارلیمانی سیکرٹری اسفند یار کاکڑ، چیئرمین پبلک اکاؤنٹس کمیٹی اصغر ترین، کمشنر کوئٹہ ڈویژن شاہزیب خان کاکڑ اور ڈپٹی کمشنر پشین نے شرکت کی، جبکہ صوبائی وزیر صحت بخت محمد کاکڑ اور رکن صوبائی اسمبلی زمرک خان اچکزئی آن لائن شریک ہوئے۔

اجلاس کے دوران کاریزات کو ضلع بنانے سے متعلق حلقے کے منتخب نمائندوں کی تجاویز کا تفصیلی جائزہ لیا گیا، جبکہ مختلف سیاسی جماعتوں پر مشتمل کمیٹی اراکین کی آراء پر بھی غور کیا گیا۔ اس موقع پر فیصلہ کیا گیا کہ حکومتی مذاکراتی کمیٹی تمام تجاویز کا باریک بینی سے جائزہ لینے کے بعد جامع سفارشات مرتب کرے گی۔