شاہراہوں کو تجاوزات سے پاک کرنے کے لیے مربوط اور مؤثر اقدامات کیے جائیں،مہر اللہ بادینی

کوئٹہ: ائیرپورٹ روڈ پر تجاوزات کے خلاف مجوزہ آپریشن کے حوالے سے ڈپٹی کمشنر کوئٹہ مہراللہ بادینی کی زیر صدارت نیشنل ہائی وے اتھارٹی (NHA) کے افسران کے ساتھ اہم اجلاس منعقد ہوا۔

اجلاس میں ایڈیشنل ڈپٹی کمشنر (جنرل) محمد انور کاکڑ، این ایچ اے افسران، اسسٹنٹ کمشنر سٹی، اسسٹنٹ کمشنر صدر، اسسٹنٹ کمشنر کچلاک اور اسسٹنٹ کمشنر سریاب نے شرکت کی۔

اجلاس کے دوران قومی شاہراہوں اور خصوصاً ائیرپورٹ روڈ پر قائم ناجائز تجاوزات کے خاتمے کے حوالے سے تفصیلی غور و خوض کیا گیا۔ متعلقہ حکام نے ڈپٹی کمشنر کو موجودہ صورتحال اور مجوزہ کارروائیوں پر بریفنگ دی۔

ڈپٹی کمشنر مہراللہ بادینی نے ہدایت کی کہ شاہراہوں کو تجاوزات سے پاک کرنے کے لیے مربوط اور مؤثر اقدامات کیے جائیں تاکہ ٹریفک کی روانی بہتر ہو اور شہریوں کو سہولت فراہم کی جا سکے۔