ڈیجیٹل میڈیا کے ذریعے مثبت اور مستند معلومات کی فراہمی نہایت ضروری ہے،عسکر خان

کوئٹہ: ڈائریکٹر جنرل پبلک ریلیشنز بلوچستان عسکر خان کی سربراہی میں ڈیجیٹل پبلشرز اور سوشل میڈیا انفلوینسرز کے ساتھ ایک مشاورتی اجلاس منعقد ہوا۔ اجلاس میں مختلف اخبارات اور سوشل میڈیا سے وابستہ نمایاں شخصیات نے شرکت کی، جن میں جیند بلوچ، ظفر علی، علی شاہ، آغا عبید، مرتضیٰ ترین، غفار لانگو، بیبرگ بلوچ اور سوشل میڈیا سے وابستہ مرتضیٰ زہری، نقیب اللہ، فضل الرحمان، عبد الوکیل سہیل شامل تھے۔

اجلاس میں ڈیجیٹل میڈیا سے متعلق پالیسی کے مختلف پہلوؤں اور مجوزہ اقدامات پر تفصیلی مشاورت کی گئی۔ شرکاء نے زور دیا کہ بدلتے ہوئے میڈیا کے تقاضوں کے مطابق ڈیجیٹل میڈیا کو منظم اور موثر انداز میں فروغ دینا ضروری ہے۔

ڈی جی پی آر عسکر خان نے کہا کہ حکومت بلوچستان وزیر اعلیٰ میر سرفراز بگٹی کے وژن کے مطابق ڈیجیٹل میڈیا کے فروغ کے لیے اقدامات کر رہی ہے اور تمام اسٹیک ہولڈرز سے مشاورت جاری ہے تاکہ حتمی پالیسی مرتب کی جا سکے۔ انہوں نے کہا کہ ڈیجیٹل پبلشرز اور سوشل میڈیا سے وابستہ افراد کو سہولیات اور الاؤنسز فراہم کرنے کے لیے جامع حکمت عملی تیار کی جا رہی ہے، جس میں میرٹ اور مقامی افراد کو ترجیح دی جائے گی۔

عسکر خان نے مزید کہا کہ ڈیجیٹل میڈیا کے ذریعے مثبت اور مستند معلومات کی فراہمی نہایت اہم ہے، اور اس مقصد کے لیے حکومت، میڈیا اور سوشل میڈیا نمائندگان کے درمیان تعاون کو فروغ دیا جائے گا۔ انہوں نے امید ظاہر کی کہ اس طرح کے مشاورتی اجلاس مستقبل میں بھی منعقد ہوتے رہیں گے تاکہ ڈیجیٹل میڈیا کے شعبے کو مزید مضبوط اور منظم بنایا جا سکے۔