اوستامحمد میں رائس ملز ایسوسی ایشن کی نومنتخب کابینہ نے حلف اٹھا لیا

اوستامحمد (نمائندہ خصوصی)
رائس ملز ایسوسی ایشن اوستامحمد کی نومنتخب کابینہ کی حلف برداری کی تقریب
اوستامحمد میں رائس ملز ایسوسی ایشن کی نومنتخب کابینہ کی حلف برداری کی تقریب منعقد ہوئی، جس میں ایسوسی ایشن کے سابق صدر حاجی عابد حسین بھنگر نے نومنتخب صدر عبدالحفیظ سومرو اور کابینہ کے دیگر عہدیداروں سے حلف لیا۔
تقریب میں رائس ملز ایسوسی ایشن کے ممبران، مل مالکان اور دیگر معزز شخصیات نے شرکت کی۔اس موقع پر نومنتخب صدر عبدالحفیظ سومرو نے خطاب کرتے ہوئے کہا کہ وہ تمام رائس مل مالکان کو ساتھ لے کر چلیں گے اور ایسوسی ایشن کو درپیش مسائل کے حل کے لیے بھرپور کردار ادا کریں گے۔ انہوں نے کہا کہ تمام ممبران کے باہمی تعاون، اتفاقِ رائے اور مشاورت سے مل مالکان کے مسائل متعلقہ حکام تک پہنچائے جائیں گے اور ان کے حل کے لیے مشترکہ جدوجہد کی جائے گی۔تقریب کے اختتام پر نومنتخب صدر اور کابینہ کے دیگر عہدیداروں کو مبارکباد پیش کی گئی اور ان کے لیے نیک خواہشات کا اظہار کیا گیا۔