پنجاب کے 2 صوبائی حلقوں میں ضمنی انتخابات کے لیے پولنگ جاری

پنجاب کے دو انتخابی حلقوں این اے 77 گوجرانوالہ اور پی پی 203 چیچہ وطنی میں ضمنی انتخابات کے لیے پولنگ جاری ہے۔ انتخابی عمل صبح 8 بجے شروع ہوا جو بغیر کسی وقفے کے شام 5 بجے تک جاری رہے گا۔

گوجرانوالہ کے قومی اسمبلی کے حلقے این اے 77 میں ضمنی انتخاب کے لیے تمام انتظامات مکمل کیے گئے ہیں۔ حلقے میں 5 لاکھ 18 ہزار 620 رجسٹرڈ ووٹرز اپنا حق رائے دہی استعمال کریں گے، جن میں 2 لاکھ 77 ہزار 480 مرد اور 2 لاکھ 41 ہزار 140 خواتین ووٹرز شامل ہیں۔

انتخابی حکام کے مطابق حلقے میں مجموعی طور پر 333 پولنگ اسٹیشن قائم کیے گئے ہیں، جن میں 12 انتہائی حساس اور 34 حساس قرار دیے گئے ہیں۔ امن و امان برقرار رکھنے کے لیے پولیس کے 2 ہزار 982 اہلکار تعینات کیے گئے ہیں جبکہ رینجرز کے دستے کوئیک رسپانس فورس کے طور پر موجود ہیں۔

این اے 77 میں مجموعی طور پر 11 امیدوار میدان میں ہیں۔ مسلم لیگ ن کے راشد بشیر ورک، مرحوم رکن قومی اسمبلی محمود بشیر ورک کے صاحبزادے ہیں۔ مرکزی مسلم لیگ کے قاضی ابراہیم گجر اور آزاد امیدوار الفت رسول وڑائچ سمیت دیگر امیدوار بھی انتخابی عمل میں حصہ لے رہے ہیں۔

پاکستان تحریک انصاف نے انتخابی عمل کا بائیکاٹ کیا ہے جبکہ پاکستان پیپلز پارٹی نے اپنا امیدوار نامزد نہیں کیا۔ این اے 77 کی نشست محمود بشیر ورک کے انتقال کے باعث خالی ہوئی تھی۔

دوسری جانب چیچہ وطنی کے صوبائی اسمبلی کے حلقے پی پی 203 میں بھی ضمنی انتخاب کے لیے پولنگ جاری ہے۔ یہ نشست مسلم لیگ ن کے رکن پنجاب اسمبلی چوہدری محمد حنیف جٹ کے انتقال کے باعث خالی ہوئی تھی۔ ان کے صاحبزادے چوہدری اسد حنیف جٹ مسلم لیگ ن کے انتخابی نشان شیر پر انتخاب لڑ رہے ہیں۔