اکاؤنٹنٹ جنرل بلوچستان کا بڑا فیصلہ: ملازمین کے لیے سالانہ جی پی فنڈ سلپ کی شرط ختم

اکاؤنٹنٹ جنرل (اے جی) بلوچستان نے سرکاری ملازمین کی سہولت کے لیے ایک اہم اور احسن اقدام اٹھاتے ہوئے سالانہ جی پی فنڈ سلپ کی شرط ختم کر دی ہے۔

بلوچستان اکاؤنٹنٹ جنرل آفس کی جانب سے جاری کردہ رسمی اعلامیے کے مطابق، مالی سال 26-2025 کے لیے جی پی فنڈ کا نیا ریٹ SAP سسٹم کے ذریعے ملازمین کے لیے لاگو کر دیا گیا ہے۔ اس نئے نظام کے بعد اب تمام سرکاری ملازمین کو بلاوجہ سالانہ جی پی فنڈ سلپ بنوانے کی ضرورت نہیں رہے گی۔

اعلامیے میں مزید وضاحت کی گئی ہے کہ سالانہ جی پی فنڈ سلپ صرف اسی صورت میں جاری کی جائے گی جب کسی ملازم نے ایڈوانس جی پی فنڈ حاصل کرنا ہو یا فائنل جی پی فنڈ کی رقم نکلوانا مقصود ہو۔ نیز، ایڈوانس یا فائنل جی پی فنڈ نکالنے کی رقم کا اندراج اب روایتی لیجر میں درج نہیں کیا جائے گا بلکہ اسے نئے ڈیجیٹل طریقہ کار کے تحت ہی پروسیس کیا جائے گا۔

اکاؤنٹنٹ جنرل بلوچستان کے اس اقدام کو سرکاری ملازمین کے لیے ایک بڑا ریلیف اور دفاتر کے چکروں سے نجات کا بہترین ذریعہ قرار دیا جا رہا ہے۔