پیٹرولیم لیوی؛ جماعت اسلامی اور حکومتی ٹیموں کے درمیان مذاکرات کا امکان

اسلام آباد: پیٹرولیم لیوی کے خلاف جماعت اسلامی کے احتجاج کے معاملے پر حکومت اور جماعت اسلامی کی قیادت کے درمیان مذاکرات کا امکان پیدا ہوگیا ہے، تاہم واضح ریلیف نہ ملنے کی صورت میں جماعت اسلامی نے لانگ مارچ دوبارہ شروع کرنے کا فیصلہ کیا ہے۔

ذرائع کے مطابق جماعت اسلامی اور حکومتی مذاکراتی ٹیموں کے درمیان آئندہ دو روز میں ملاقات متوقع ہے، جبکہ وزیراعظم شہباز شریف اور امیر جماعت اسلامی حافظ نعیم الرحمان کے درمیان بھی رواں ہفتے ملاقات کا امکان ہے۔ اس ملاقات میں پیٹرولیم لیوی کے خاتمے اور عوام کو ریلیف دینے سے متعلق امور پر بات چیت متوقع ہے۔

ذرائع کا کہنا ہے کہ جماعت اسلامی کی مرکزی قیادت کے اجلاس میں فیصلہ کیا گیا ہے کہ اگر وزیراعظم اور حافظ نعیم الرحمان کی ملاقات میں عوام کو واضح اور ٹھوس ریلیف نہ ملا تو احتجاجی لانگ مارچ دوبارہ شروع کیا جائے گا۔

جماعت اسلامی کے ذرائع کے مطابق لانگ مارچ اکتوبر کے آخری ہفتے یا نومبر کے پہلے ہفتے میں شروع کیا جا سکتا ہے۔ حکومت کی جانب سے واضح ریلیف ملنے کی صورت میں ہی مذاکراتی عمل کو آگے بڑھایا جائے گا۔