یوکرین اور روس کے درمیان جاری جنگ ختم کرانا چاہتا ہوں، ڈونلڈ ٹرمپ

واشنگٹن: امریکی صدر ڈونلڈ ٹرمپ نے کہا ہے کہ وہ روس اور یوکرین کے درمیان جاری جنگ ختم کرانا چاہتے ہیں اور ایسا کوئی قدم نہیں اٹھانا چاہتے جس سے روس مذاکرات سے پیچھے ہٹ جائے۔

سوشل میڈیا پلیٹ فارم ٹروتھ سوشل پر اپنے بیان میں ٹرمپ نے دعویٰ کیا کہ روس اور یوکرین کے درمیان امن مذاکرات میں نمایاں پیش رفت ہو رہی ہے، جن میں یرغمالیوں کی رہائی سے متعلق بات چیت بھی شامل ہے۔

امریکی صدر نے کہا کہ روس ایران کی اتنی مدد نہیں کر رہا جتنی وہ کر سکتا ہے، اور وہ چاہتے ہیں کہ یہ صورت حال برقرار رہے۔

ٹرمپ نے یوکرینی صدر ولادیمیر زیلنسکی پر روس کی ڈیزل ریفائنریوں کو نشانہ بنانے کا الزام بھی عائد کیا۔ ان کے مطابق ان حملوں سے ڈیزل کی عالمی منڈی اور امریکی کسانوں، مویشی پالنے والوں اور کاروباری اداروں کو نقصان پہنچ رہا ہے۔

ٹرمپ نے زیلنسکی پر جنگ ختم کرنے میں عدم دلچسپی کا الزام لگاتے ہوئے کہا کہ یوکرین کو یورپی ممالک سے بھاری مالی امداد مل رہی ہے۔ انہوں نے یوکرین کے علاقائی اور فوجی نقصانات کا بھی ذکر کیا۔

تاہم، ٹرمپ کے ان الزامات اور دعوؤں کی آزادانہ تصدیق فراہم نہیں کی گئی۔