متعدد قتل پر عمر قید کی سزائیں الگ شمار ہوں گی یا ایک؟سپریم کورٹ لارجر بینچ کا غور جاری

اسلام آباد: متعدد افراد کے قتل کے مقدمات میں عمر قید کی سزائیں بیک وقت چلیں گی یا یکے بعد دیگرے، اس اہم قانونی معاملے پر سپریم کورٹ کے 7 رکنی لارجر بینچ کا غور جاری ہے۔ پنجاب حکومت نے عدالت میں اپنا تحریری جواب جمع کرا دیا ہے۔

پنجاب پراسیکیوشن نے مؤقف اختیار کیا ہے کہ قتل، اغوا، جنسی زیادتی اور دہشت گردی جیسے سنگین جرائم میں حالات کے مطابق سزائیں یکے بعد دیگرے چلانے کا حکم دیا جانا چاہیے، تاکہ ہر جرم کی سنگینی واضح ہو اور نظامِ انصاف پر عوام کا اعتماد برقرار رہے۔

تحریری جواب میں کہا گیا ہے کہ متعدد قتل کے مجرم کو ایسا فائدہ نہیں ملنا چاہیے کہ ایک یا کئی افراد کے قتل کے باوجود سزاؤں کو بیک وقت شمار کرکے وہ نسبتاً کم مدت میں رہا ہو جائے۔ پراسیکیوشن کے مطابق سزاؤں کا مقصد جرائم کی روک تھام، مجرموں کی اصلاح اور عوام کا تحفظ بھی ہے۔

پنجاب حکومت نے یہ مؤقف بھی اپنایا کہ عدالت کو اپنے فیصلے میں واضح کرنا چاہیے کہ مختلف سزائیں بیک وقت نافذ ہوں گی یا یکے بعد دیگرے۔ جواب میں عمر قید کی قانونی مدت اور معافی یا تخفیف کے بعد قید کی عملی مدت سے متعلق سوالات بھی اٹھائے گئے ہیں۔

جسٹس جمال خان مندوخیل کی سربراہی میں 7 رکنی لارجر بینچ اس بنیادی سوال کا بھی جائزہ لے رہا ہے کہ پاکستان میں عمر قید سے مراد کتنی مدت ہے اور متعدد قتل کے مقدمات میں ایک سے زیادہ عمر قید کی سزاؤں کا اطلاق کیسے ہوگا۔