وزیراعلیٰ سندھ کا شہدائے کارساز کو خراجِ عقیدت

کراچی: وزیراعلیٰ سندھ سید مراد علی شاہ نے 18 اکتوبر کے شہدائے کارساز کو خراجِ عقیدت پیش کرتے ہوئے کہا ہے کہ 18 اکتوبر 2007 کا دن ملکی تاریخ میں جمہوریت کے لیے دی جانے والی لازوال قربانیوں کی یاد دلاتا ہے۔

اپنے بیان میں مراد علی شاہ نے کہا کہ محترمہ بینظیر بھٹو شہید کے تاریخی استقبال کے لیے آنے والے نہتے جیالوں پر حملہ بزدلانہ کارروائی تھی، جبکہ سانحہ کارساز کے شہداء نے اپنی جانوں کا نذرانہ پیش کرکے جمہوری جدوجہد کی تاریخ میں قربانیوں کی نئی مثال قائم کی۔

وزیراعلیٰ سندھ نے کہا کہ دھماکوں کے باوجود جیالوں نے اپنی جانوں کی پروا کیے بغیر محترمہ بینظیر بھٹو شہید کی حفاظت کی۔ شہداء کی قربانیاں کبھی رائیگاں نہیں جائیں گی اور پاکستان پیپلز پارٹی ان کے مشن پر کاربند رہے گی۔

انہوں نے کہا کہ صدر آصف علی زرداری اور چیئرمین پاکستان پیپلز پارٹی بلاول بھٹو زرداری شہداء کے جمہوری سفر کو آگے بڑھا رہے ہیں۔ سانحہ کارساز کا غم آج بھی پاکستانیوں کے دلوں میں تازہ ہے۔

مراد علی شاہ نے سانحہ کارساز کے تمام شہداء کے درجات کی بلندی اور ان کے لواحقین کے لیے صبرِ جمیل کی دعا بھی کی۔