امریکی بحریہ کی پاکستانی سرزمین سے ایران کے خلاف کارروائی کا دعویٰ بے بنیاد ہے، وزارت اطلاعات

اسلام آباد: وزارت اطلاعات و نشریات نے امریکی بحریہ کی جانب سے پاکستانی سرزمین سے ایران کے خلاف کارروائی کرنے کے دعوے کو مسترد کرتے ہوئے اسے بے بنیاد اور من گھڑت پروپیگنڈا قرار دیا ہے۔

وزارت اطلاعات نے سماجی رابطے کی ویب سائٹ ایکس پر جاری بیان میں واضح کیا کہ شمالی امریکا سے تعلق رکھنے والے ایک سوشل میڈیا اکاؤنٹ کی جانب سے یہ دعویٰ کیا گیا تھا کہ امریکی بحریہ پاکستانی اجازت سے پاکستان کی سرزمین استعمال کرتے ہوئے ایران کے خلاف کارروائیاں کر رہی ہے، تاہم یہ دعویٰ حقیقت پر مبنی نہیں۔

وزارت کے مطابق اس قسم کی بے بنیاد پوسٹس پھیلانا عوام میں کنفیوژن، غلط فہمیوں اور انتشار کو ہوا دینے کے ایجنڈے کا حصہ ہے۔ ایسے دعووں کو کسی سنجیدہ مبصر کی توجہ کے لائق نہیں سمجھنا چاہیے۔

وزارت اطلاعات و نشریات نے زور دیا کہ من گھڑت خبروں اور پروپیگنڈے کو حقیقت کے طور پر پیش کرنے کے بجائے انہیں بے بنیاد دعووں کے طور پر ہی دیکھا جانا چاہیے۔