کے پی میں گورنر راج اور ایمرجنسی کے نفاذ کیخلاف درخواستیں سماعت کے لیے مقرر

پشاور: پشاور ہائی کورٹ نے خیبرپختونخوا میں گورنر راج اور ایمرجنسی کے نفاذ کے خلاف دائر درخواستیں 20 اکتوبر کو سماعت کے لیے مقرر کر دیں۔

ایکسپریس نیوز کے مطابق بیرسٹر گوہر خان اور سلمان خان ایڈووکیٹ نے گورنر راج اور ایمرجنسی کے نفاذ کو چیلنج کرتے ہوئے الگ الگ درخواستیں دائر کر رکھی ہیں، جن میں وفاقی حکومت، صدر، وزیراعظم، گورنر خیبرپختونخوا اور دیگر متعلقہ حکام کو فریق بنایا گیا ہے۔

درخواست گزاروں نے مؤقف اختیار کیا ہے کہ دہشتگردی کو بنیاد بنا کر منتخب صوبائی حکومت کے خلاف کارروائی امتیازی سلوک کے مترادف ہے۔ درخواستوں میں کہا گیا ہے کہ بلوچستان میں دہشتگردی اور جانی نقصانات کے باوجود گورنر راج نافذ نہیں کیا گیا، جبکہ خیبرپختونخوا میں پی ٹی آئی کی منتخب حکومت کے اختیارات ختم کرنے کی کوشش کی جا رہی ہے۔

درخواستوں میں مزید مؤقف اپنایا گیا ہے کہ 2007 سے 2015 تک دہشتگردی کے باوجود خیبرپختونخوا میں گورنر راج نافذ نہیں کیا گیا۔ درخواست گزاروں کے مطابق دہشتگردی کے خلاف مؤثر اقدامات نہ کرنے کے الزامات کو سیاسی دباؤ بڑھانے کے لیے استعمال کیا جا رہا ہے، جبکہ وفاقی حکومت کو سیاسی اختلافات کی بنیاد پر منتخب صوبائی حکومت کے اختیارات ختم کرنے کا اختیار نہیں۔

درخواست گزاروں نے یہ بھی کہا ہے کہ پی ٹی آئی نے 2024 کے عام انتخابات میں خیبرپختونخوا میں دو تہائی اکثریت حاصل کی تھی، اس لیے گورنر راج کے نفاذ کے لیے آئین کے آرٹیکل 234 اور ایمرجنسی کے لیے آرٹیکل 232 سمیت متعلقہ آئینی تقاضوں پر عمل ضروری ہے۔

درخواستوں میں مؤقف اختیار کیا گیا ہے کہ آئینی اور جمہوری احتجاج کو امن و امان کے لیے خطرہ قرار دے کر منتخب حکومت کو معطل کرنا قابلِ سوال ہے۔ عدالت سے استدعا کی گئی ہے کہ گورنر راج اور ایمرجنسی کے نفاذ کو غیرقانونی قرار دے کر کالعدم کیا جائے اور حتمی فیصلے تک گورنر راج کے اعلامیے کو معطل کیا جائے۔

دوسری جانب تحریک تحفظ آئین پاکستان نے بھی خیبرپختونخوا میں گورنر راج اور ایمرجنسی کے نفاذ کو پشاور ہائی کورٹ میں چیلنج کر دیا ہے۔ قومی اسمبلی میں قائد حزب اختلاف محمود خان اچکزئی نے معظم بٹ ایڈووکیٹ کے توسط سے درخواست دائر کی، جس میں دونوں اقدامات کو کالعدم قرار دینے کی استدعا کی گئی ہے۔

اس موقع پر سینیٹ میں قائد حزب اختلاف علامہ راجہ ناصر عباس، سردار اختر مینگل اور اخونزادہ حسین احمد بھی پشاور ہائی کورٹ پہنچے۔