مہنگائی اور ظالمانہ ٹیکسوں نے غریب عوام کی زندگی اجیرن بنا دی ہے، مولانا عبدالقادرلونی

جمعیت علماءاسلام نظریاتی پاکستان کے مرکزی امیر مولانا عبدالقادرلونی مرکزی جنرل سیکرٹری مولانا محمودالحسن قاسمی صوباٸی امیر خیبرپختونخوا مولانا قاضی گل الرحمن نکیال صوباٸی امیر بلوچستان مولاناقاری مہراللہ صوباٸی امیر مولانا عزیزاحمد شاہ امروٹی صوباٸی امیر پنجاب مولانا ثناءاللہ فاروقی صوباٸی جنرل سیکرٹری مفتی شفیع الدین مرکزی ناٸب امیرمولاناعبدالوہاب ڈھیر مرکزی نائب امیر مولانا عبدالروف سرپرست اعلی مولانا ڈاکٹرشمس الھدی مرکزی سیکرٹری اطلاعات سید حاجی عبدالستار شاہ چشتی مرکزی سیکرٹری مالیات حاجی حیات اللہ کاکڑ نے کہا کہ ملک اس وقت سیاسی، معاشی اور اخلاقی لحاظ سے دیوالیہ ہو چکا ہے۔ نااہل حکمرانوں نے مہنگائی کے ذریعے عوام کی امیدوں پر شب خون مارا ہے۔ انہوں نے کہا کہ ملک کو ایک سوچی سمجھی سازش کے تحت تاریک دلدل میں دھکیلا جا رہا ہے۔ ایک طرف نااہل حکمران اپنی ذاتی عیاشیوں، شاہ خرچیوں اور مراعات میں کوئی کمی نہیں لاتے، جبکہ دوسری طرف غریب اور محنت کش عوام پر آئے روز مہنگائی اور ظالمانہ ٹیکسوں کا نیا بوجھ لادا جا رہا ہے۔ اربوں روپے کے بھاری ٹیکسز وصول کرنے کے باوجود ملک قرضوں کے مزید خوفناک بوجھ تلے دبتا چلا جا رہا ہے اور معیشت کو مکمل تباہی کے دہانے پر لا کھڑا کیا گیا ہے۔معاشی استحصال اور ان ظالمانہ فیصلوں سے ملک کا مستقبل انتہائی خطرناک بحران کی کیفیت سے دوچار ہو رہا ہے۔ انہوں نے کہا کہ مسلسل مہنگاٸی اور بے تحاشہ اضافے سے ملک میں بیروزگاری کا طوفان آچکا ہے اور عوام کی قوتِ خرید بالکلیہ ختم ہو کر رہ گئی ہے۔ جس سے غریب اور متوسط طبقہ سسک سسک کر ایک اذیت ناک زندگی گزارنے پر مجبور ہو گیا ہے۔ پاکستان کی تاریخ میں عوام نے کبھی اتنے بدترین مہنگائی اور بدامنی کے حالات نہیں دیکھے۔ ملک کے اندر معیشت کا ہر پہلو جمود کا شکار ہو چکا ہے اور عام آدمی کے لیے دو وقت کی روٹی کا حصول بھی ایک خواب بنتا جا رہا ہے۔انہوں نے کہاکہ حکومت کے معیشت بہتری کے تمام دعوے اور طفل تسلیاں سراسر جھوٹ کا پلندہ ثابت ہو چکی ہیں۔ ایک طرف مہنگائی اور بے روزگاری کا راج ہے تو دوسری طرف ملک بھر میں بڑھتی ہوئی بدامنی نے عوام کا جینا دوبھر کر رکھا ہے۔ حکمرانوں کے پاس نہ تو کوئی عوامی درد ہے اور نہ ہی ملک کو اس دلدل سے نکالنے کی کوئی صلاحیت موجود ہے۔ عوام حکومت کے ڈرامائی طرزِ عمل اور جھوٹے نعروں سے مکمل طور پر عاجز آ چکے ہیں۔
انہوں نے کہا کہ ​عوام پر عائد تمام ظالمانہ ٹیکسز اور لیوی فوری طور پر ختم کی جائیں تاکہ غریب عوام سکھ کا سانس لے سکیں۔