میرپورخاص میں این جی اوز کی سالانہ کارکردگی کا جائزہ اجلاس منعقد

میرپورخاص (عباس آرائیں) محکمہ سوشل ویلفیئر میرپورخاص کے زیر اہتمام ضلع بھر میں کام کرنے والی غیر سرکاری تنظیموں (این جی اوز) کی سالانہ کارکردگی کا جائزہ لینے کے لیے ایک اہم اجلاس ڈائریکٹر سوشل ویلفیئر محمد رفیق جمالی کی صدارت میں منعقد ہوا، جس میں ڈپٹی ڈائریکٹر زوہیب خانزادہ سمیت محکمہ کے دیگر افسران اور مختلف این جی اوز کے نمائندوں نے شرکت کی۔

اجلاس کے دوران شرکاء نے اپنی اپنی تنظیموں کی سالانہ سرگرمیوں، کامیابیوں اور کمیونٹی ڈویلپمنٹ کے لیے جاری اقدامات کے حوالے سے آگاہ کیا۔ اس موقع پر سماجی خدمات کے معیار کو بہتر بنانے، محکمہ سوشل ویلفیئر اور غیر سرکاری تنظیموں کے درمیان رابطوں کو مضبوط بنانے اور معاشرے کے کمزور طبقات، بالخصوص معذور افراد کی ضروریات پوری کرنے کے حوالے سے تفصیلی تبادلۂ خیال کیا گیا۔

اجلاس میں سماجی بہبود، معذور افراد کے حقوق کے تحفظ اور سرکاری محکموں و غیر سرکاری تنظیموں کے درمیان باہمی تعاون کو فروغ دینے کے عزم کا اعادہ کیا گیا۔ شرکاء نے اس بات پر زور دیا کہ مستحق افراد تک سماجی خدمات کی مؤثر فراہمی اور ان کے مسائل کے حل کے لیے مشترکہ کوششیں ناگزیر ہیں۔

اس موقع پر میرپورخاص اسپیشل اسپورٹس اینڈ ویلفیئر ایسوسی ایشن (MSSWA) اور گلستانِ معذورین میرپورخاص کے صدر قمرالدین ملک نے بھی شرکت کی۔ انہوں نے معذور افراد کی فلاح و بہبود، حقوق کے تحفظ اور انہیں معاشرے میں بااختیار بنانے کے لیے اپنی تنظیم کی کوششوں سے آگاہ کیا۔

قمرالدین ملک نے کہا کہ محکمہ سوشل ویلفیئر اور غیر سرکاری تنظیموں کے درمیان مؤثر تعاون کے ذریعے ضلع بھر کے مستحق اور معذور افراد کے معیارِ زندگی کو بہتر بنایا جا سکتا ہے۔ انہوں نے اس امر پر زور دیا کہ معذور افراد کو درپیش مسائل کے حل، انہیں ضروری سہولیات کی فراہمی اور معاشرے میں ان کی بھرپور شمولیت کو یقینی بنانے کے لیے مربوط اقدامات کیے جائیں۔

اجلاس کو ضلع میرپورخاص میں سماجی بہبود کے شعبے کو مزید فعال بنانے، این جی اوز کی کارکردگی بہتر بنانے اور مستحق و معذور افراد کی فلاح و بہبود کے لیے باہمی تعاون کو فروغ دینے کی جانب ایک اہم پیش رفت قرار دیا گیا۔