دشمن کیخلاف طویل جنگ جاری رکھنے کیلئے ہمارے پاس اسلحے کی وافر پیداواری صلاحیت موجود ہے: ایران

تہران: ایران نے دعویٰ کیا ہے کہ اس کے پاس طویل جنگ جاری رکھنے کے لیے اسلحہ تیار کرنے کی وافر صلاحیت موجود ہے، جبکہ جنگ کے دوران ہتھیاروں کی پیداوار میں پہلے کے مقابلے میں ڈھائی گنا اضافہ ہوا ہے۔

ایرانی وزارت دفاع کے ترجمان رضا طلائی نیک نے سرکاری ٹیلی ویژن کو انٹرویو دیتے ہوئے کہا کہ ایران کا پیداواری نظام طویل اور مسلسل جنگ کی ضروریات پوری کرنے کی صلاحیت رکھتا ہے۔

ان کے مطابق ایران نے پہلے ہی متبادل اور محفوظ پیداواری مقامات تیار کر رکھے تھے، جس کے باعث جنگ کے دوران فوجی سازوسامان کی تیاری ایک دن کے لیے بھی نہیں رکی۔

رضا طلائی نیک نے بتایا کہ جنگ کے دوران تقریباً 9 ہزار کمپنیوں نے رضاکارانہ طور پر فوجی سازوسامان کی تیاری میں حصہ لیا۔ ان کا کہنا تھا کہ وزارت دفاع کا عملہ میزائل اور ڈرون یونٹس سمیت بحری و فضائی افواج کے ساتھ مل کر کام کر رہا ہے تاکہ میدانِ جنگ کے تجربات کی بنیاد پر ہتھیاروں اور دفاعی سازوسامان کو مزید بہتر بنایا جا سکے۔

ایرانی ترجمان کے مطابق ملک کی پہلی ترجیح اپنی فوجی ضروریات پوری کرنا ہے، تاہم مستقبل میں اضافی دفاعی مصنوعات کی برآمدات بڑھانے کا بھی ارادہ ہے۔