خیبر پختونخوا میں ڈپٹی وزیراعلیٰ کی تقرری کے کیس کی سماعت

پشاور: خیبرپختونخوا میں ڈپٹی وزیراعلیٰ کی تقرری سے متعلق کیس کی پشاور ہائیکورٹ میں سماعت ہوئی، عدالت نے صوبائی حکومت سے جواب طلب کرلیا۔

جسٹس اعجاز انور کی سربراہی میں پشاور ہائیکورٹ کے 2 رکنی بینچ نے درخواست کی سماعت کی۔ دوران سماعت درخواست گزار کے وکیل نے مؤقف اختیار کیا کہ خیبرپختونخوا میں اس وقت گورننس کا بحران ہے جبکہ حکومت دھرنوں، جلسوں اور احتجاجی سرگرمیوں میں مصروف ہے۔

درخواست گزار کے وکیل نے عدالت سے استدعا کی کہ صوبے میں ڈپٹی وزیراعلیٰ مقرر کیا جائے تاکہ حکومتی امور کو بہتر انداز میں چلانے کے ساتھ عوامی مسائل کے حل پر بھی توجہ دی جاسکے۔

عدالت نے دلائل سننے کے بعد صوبائی حکومت سے درخواست پر جواب طلب کرلیا اور کیس کی مزید سماعت ملتوی کردی۔