فتنہ الہندوستان کے خلاف کامیاب کارروائی سیکیورٹی فورسز کی پیشہ ورانہ صلاحیتوں کا ثبوت ہے، سرفراز بگٹی

کوئٹہ: وزیراعلیٰ بلوچستان میر سرفراز بگٹی نے مستونگ میں سیکیورٹی فورسز کی کامیاب کارروائی پر اطمینان کا اظہار کرتے ہوئے کہا ہے کہ فتنہ الہندوستان کے خلاف کامیاب آپریشن سیکیورٹی فورسز کی پیشہ ورانہ صلاحیتوں کا ثبوت ہے۔

وزیراعلیٰ بلوچستان نے کہا کہ مستونگ آپریشن میں 5 دہشت گردوں کو ہلاک کرنا سیکیورٹی فورسز کی کامیاب کارروائی کا مظہر ہے، جبکہ کارروائی کے دوران بھاری مقدار میں اسلحہ اور گولہ بارود کی برآمدگی بھی اہم پیش رفت ہے۔

میر سرفراز بگٹی نے کہا کہ بلوچستان میں دہشت گردی کے مکمل خاتمے کے لیے سیکیورٹی فورسز کی کارروائیاں جاری ہیں اور صوبے میں امن و استحکام کے دشمنوں کو کسی صورت رعایت نہیں دی جائے گی۔

انہوں نے کہا کہ دہشت گردی کے خلاف جنگ میں حکومت اور عوام سیکیورٹی فورسز کے ساتھ متحد ہیں۔ بلوچستان کی سرزمین کو دہشت گرد عناصر سے پاک کرنے کے لیے تمام دستیاب وسائل بروئے کار لائے جا رہے ہیں۔

وزیراعلیٰ بلوچستان کا کہنا تھا کہ دہشت گردی کے مکمل خاتمے تک فتنہ الہندوستان کے خلاف کارروائیاں جاری رہیں گی اور امن کے دشمنوں کو بلوچستان میں اپنے مذموم عزائم کی تکمیل کی اجازت نہیں دی جائے گی۔