پاکستان کی سفارتی کامیابی، اقوام متحدہ میں پانی اور صفائی ستھرائی کےانسانی حق سے متعلق قرارداد منظور

جنیوا: اقوام متحدہ کی انسانی حقوق کونسل میں محفوظ پینے کے پانی اور صفائی ستھرائی کے انسانی حق سے متعلق قرارداد اتفاقِ رائے سے منظور کرلی گئی، جس میں سرحد پار آبی تعاون کو بھی واضح طور پر شامل کیا گیا ہے۔

پاکستان نے قرارداد کے حتمی متن میں سرحد پار آبی تعاون کا حوالہ شامل کرانے کے لیے فعال سفارتی کردار ادا کیا۔ رپورٹ کے مطابق بھارت کی جانب سے قرارداد سے سرحد پار آبی تعاون کا حوالہ نکالنے کی کوشش کی گئی، تاہم یہ حوالہ حتمی متن کا حصہ برقرار رہا۔

جرمنی اور اسپین کی جانب سے پیش کی گئی قرارداد کو انسانی حقوق کونسل کے 47 رکن ممالک نے اتفاقِ رائے سے منظور کیا۔

قرارداد میں پہلی مرتبہ واضح طور پر تسلیم کیا گیا کہ سرحد پار آبی تعاون محفوظ پینے کے پانی اور صفائی ستھرائی کے انسانی حقوق کے حصول سے براہِ راست منسلک ہے۔

قرارداد کی منظوری کے موقع پر پاکستان کی جانب سے فرسٹ سیکرٹری عدیل کھوکھر نے خطاب کرتے ہوئے مشترکہ آبی وسائل کے حوالے سے پاکستان کا مؤقف پیش کیا۔

عدیل کھوکھر نے کہا کہ جہاں پانی مشترکہ ہو، وہاں ذمہ داریاں بھی مشترکہ ہوتی ہیں۔ مشترکہ آبی وسائل پر تعاون ہمسایہ ممالک کے درمیان کسی رعایت یا احسان کا معاملہ نہیں بلکہ مشترکہ ذمہ داری ہے۔

انہوں نے کہا کہ بالائی دریا کا کوئی ملک پانی کو سیاسی دباؤ یا اثر و رسوخ کے آلے کے طور پر استعمال نہیں کرسکتا۔ مشترکہ پانیوں کو سیاسی دباؤ کے بجائے تعاون اور باہمی ذمہ داری کے اصولوں کے تحت استعمال کیا جانا چاہیے۔