بلوچستان اور پختونخوا میں سیکیورٹی فورسز کی کارروائیوں میں 7 دہشتگرد ہلاک

کوئٹہ/پشاور: بلوچستان اور خیبرپختونخوا میں سیکیورٹی فورسز کی مختلف کارروائیوں کے دوران مجموعی طور پر 7 دہشت گرد ہلاک ہوگئے۔

سیکیورٹی ذرائع کے مطابق بلوچستان میں آپریشن ردالفتنہ 3 کے تحت ضلع چاغی کے علاقے نوکچہ میں فورسز نے کارروائی کی۔ اس دوران دو دہشت گرد مارے گئے۔

ذرائع کے مطابق دہشت گردوں نے نوکچہ میں ایک خالی واٹر باؤزر کو آگ لگانے کے بعد فرار ہونے کی کوشش کی، تاہم سیکیورٹی فورسز نے فوری کارروائی کرتے ہوئے دونوں دہشت گردوں کو ہلاک کردیا۔

سیکیورٹی ذرائع کا کہنا ہے کہ ہلاک دہشت گرد این 40 شاہراہ کے مختلف مقامات پر آتشزدگی کی کارروائیوں میں بھی ملوث رہے ہیں۔ ذرائع کے مطابق 31 اگست کو بھی اسی نوعیت کی کارروائیوں میں ملوث 11 دہشت گرد ہلاک کیے گئے تھے۔

دوسری جانب خیبرپختونخوا کے علاقے باڑہ میں سیکیورٹی فورسز نے انٹیلی جنس بیسڈ آپریشن کیا، جس کے دوران 5 دہشت گرد ہلاک ہوگئے۔

سیکیورٹی ذرائع کے مطابق باڑہ آپریشن کے دوران ہلاک دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا، جبکہ دہشت گردوں کے ٹھکانوں کو بھی تباہ کردیا گیا۔

سیکیورٹی فورسز کے مطابق ملک میں دہشت گردی کے خاتمے اور پائیدار امن کے قیام کے لیے کارروائیاں جاری رکھی جائیں گی۔