پرائس کنٹرول اور ترقیاتی اسکیموں کی بروقت تکمیل یقینی بنائی جائے، مہراللہ بادینی

کوئٹہ(خ ن) ڈپٹی کمشنر کوئٹہ مہراللہ بادینی کی زیرِ صدارت پرائس کنٹرول، جاری ترقیاتی اسکیمات اور انسدادِ تجاوزات کے حوالے سے انتظامی افسران کا اجلاس منعقد ہوا۔اجلاس میں متعلقہ ایڈیشنل ڈپٹی کمشنرز، اسسٹنٹ کمشنرز، مجسٹریٹس اور تحصیلداران نے شرکت کی۔ اجلاس میں ضلع کوئٹہ میں سرکاری نرخوں پر اشیائے خوردونوش کی دستیابی، جاری ترقیاتی اسکیمات پر پیش رفت اور تجاوزات کے خلاف جاری کارروائیوں کا تفصیلی جائزہ لیا گیا۔ڈپٹی کمشنر مہراللہ بادینی نے افسران کو ہدایت کی کہ پرائس کنٹرول کے عمل کو مزید مو¿ثر بناتے ہوئے گرانفروشی اور سرکاری نرخوں کی خلاف ورزی کرنے والوں کے خلاف قانون کے مطابق کارروائی یقینی بنائی جائے۔انہوں نے جاری ترقیاتی اسکیمات کی بروقت اور معیاری تکمیل پر خصوصی توجہ دینے اور فیلڈ میں باقاعدگی سے معائنہ کرنے کی ہدایت کی۔ انسدادِ تجاوزات کے حوالے سے بھی کارروائیوں کو مزید مو¿ثر بنانے اور اہم شاہراہوں و عوامی گزرگاہوں کو تجاوزات سے پاک رکھنے کے احکامات جاری کیے گئے۔ڈپٹی کمشنر نے تمام انتظامی افسران کو ہدایت کی کہ عوامی مسائل کے فوری حل اور ضلعی انتظامیہ کی کارکردگی کو مزید بہتر بنانے کے لیے اپنے اپنے علاقوں میں فعال کردار ادا کریں۔