ہرمز کھولنے کی امید کو دھچکا، ٹرمپ کے انکار کے بعد تیل کی قیمتوں میں 3 فیصد سے زیادہ اضافہ

امریکی صدر ڈونلڈ ٹرمپ کی جانب سے ایران کی سات روزہ جنگ بندی کی پیشکش مسترد کیے جانے کے بعد عالمی مارکیٹ میں خام تیل کی قیمتوں میں نمایاں اضافہ ہوگیا۔

ایران نے کہا تھا کہ جنگ بندی اور امریکی فوجی دباؤ میں کمی کی صورت میں آبنائے ہرمز کو سات روز کے اندر دوبارہ کھولا جا سکتا ہے۔ تاہم امریکی مؤقف کے بعد سرمایہ کاروں میں خطے سے تیل کی سپلائی متاثر ہونے کے خدشات ایک بار پھر بڑھ گئے۔

ایشیائی ٹریڈنگ کے دوران برینٹ خام تیل کی قیمت 3.1 فیصد اضافے سے 107.51 ڈالر فی بیرل جبکہ امریکی ویسٹ ٹیکساس انٹرمیڈیٹ کی قیمت 2.1 فیصد اضافے سے 94.32 ڈالر فی بیرل تک پہنچ گئی۔

آبنائے ہرمز عالمی توانائی کی ترسیل کا اہم راستہ ہے، اس لیے خطے میں کشیدگی اور تیل کی ترسیل میں رکاوٹ کے خدشات عالمی منڈی میں قیمتوں پر اثرانداز ہو رہے ہیں۔

ماہرین کے مطابق خام تیل کی قیمتوں میں اضافے سے عالمی سطح پر توانائی، ٹرانسپورٹ اور پیداواری لاگت پر دباؤ بڑھ سکتا ہے۔