معیاری تعلیم اور بہتر تعلیمی ماحول اولین ترجیح ہے، ماجد سلیم

مسلم باغ (پریس رپورٹ) اسسٹنٹ کمشنر مسلم باغ ماجد سلیم نے گورنمنٹ ورکر ماڈل ہائر سیکنڈری سکول مسلم باغ کا دورہ کیا۔
دورانِ دورہ اسسٹنٹ کمشنر نے سکول میں جاری تعلیمی سرگرمیوں کا تفصیلی جائزہ لیا اور اساتذہ و طلبہ کی حاضری، صفائی ستھرائی کی صورتحال اور دستیاب تعلیمی سہولیات کا معائنہ کیا۔
اس موقع پر اسسٹنٹ کمشنر ماجد سلیم نے طلبہ سے ملاقات کی اور ان سے بات چیت کرتے ہوئے انہیں محنت، لگن اور باقاعدگی سے تعلیم حاصل کرنے کی تلقین کی۔ انہوں نے اساتذہ کو ہدایت کی کہ وہ معیارِ تعلیم مزید بہتر بنانے کے ساتھ ساتھ طلبہ کی تعلیمی و تربیتی ضروریات پر خصوصی توجہ مرکوز رکھیں۔
اس دوران گفتگو کرتے ہوئے اسسٹنٹ کمشنر مسلم باغ نے کہا کہ معیاری تعلیم کا فروغ اور تعلیمی اداروں میں بہتر ماحول کی فراہمی ضلعی انتظامیہ کی اولین ترجیحات میں شامل ہے، اور اس مقصد کے حصول کے لیے تمام ممکنہ اقدامات اٹھائے جائیں گے۔