ٹرمپ کا آزادی صحافت پر بڑا وار، 3 بڑے میڈیا اداروں کو وائٹ ہاؤس سے دور رکھنے کا اعلان کر دیا

واشنگٹن: امریکی صدر ڈونلڈ ٹرمپ نے CNN، MS NOW اور POLITICO کے صحافیوں کو وائٹ ہاؤس تک رسائی دینے پر پابندی کا اعلان کردیا۔ ٹرمپ نے ان میڈیا اداروں پر اپنی انتظامیہ کی کوریج کے دوران ’’فیک نیوز‘‘ رپورٹ کرنے کا الزام عائد کیا اور مزید میڈیا اداروں کے خلاف بھی کارروائی کا عندیہ دیا۔

ٹرمپ نے یہ اعلان سوشل میڈیا پلیٹ فارم ٹروتھ سوشل پر کیا، جبکہ بعد میں صحافیوں کے سوالات کا جواب دیتے ہوئے بھی اپنے مؤقف کو دہرایا۔ تاہم انہوں نے پابندی کی وجہ کے طور پر کسی ایک مخصوص خبر یا رپورٹ کی نشاندہی نہیں کی بلکہ متعلقہ اداروں کی مجموعی کوریج پر اعتراض کیا۔

اگلے روز پابندی پر عمل درآمد بھی کیا گیا اور CNN، MS NOW اور POLITICO کے صحافیوں کو وائٹ ہاؤس کے احاطے میں داخلے سے روک دیا گیا۔ بعض صحافیوں کے پریس پاسز غیر فعال یا ضبط کیے گئے۔

تینوں میڈیا اداروں نے پابندی کے خلاف اپنے صحافتی فرائض جاری رکھنے کا اعلان کیا ہے۔ CNN، MS NOW اور POLITICO نے آئینی حقوق کے دفاع کے لیے قانونی اقدامات کا عندیہ بھی دیا ہے۔

ٹرمپ نے نیویارک ٹائمز اور واشنگٹن پوسٹ سمیت دیگر میڈیا اداروں کو بھی تنقید کا نشانہ بنایا اور مزید اداروں کے خلاف پابندی کا اشارہ دیا۔ اس اقدام کے بعد امریکی آئین کی پہلی ترمیم، وائٹ ہاؤس تک میڈیا کی رسائی اور حکومتی اداروں کی جانب سے صحافتی کوریج پر پابندی کے قانونی دائرہ اختیار سے متعلق بحث مزید تیز ہوگئی ہے۔