سپریم کورٹ نے عمران خان کو جو ریلیف دیا وہ قانون کے مطابق نہیں، رانا ثنا اللہ

اسلام آباد: وزیراعظم کے مشیر برائے سیاسی امور رانا ثناء اللہ نے کہا ہے کہ بانی پی ٹی آئی عمران خان کو اسپتال منتقل کرنے سے متعلق سپریم کورٹ کی جانب سے دیا گیا ریلیف قانون کے مطابق نہیں، جس کے خلاف حکومت نظرثانی کی درخواست دوبارہ دائر کر رہی ہے۔

پارلیمنٹ ہاؤس میں صحافیوں سے گفتگو کرتے ہوئے رانا ثناء اللہ نے کہا کہ عمران خان کو اسپتال منتقل کرنے کے فیصلے کے خلاف نظرثانی درخواست دوبارہ دائر کی جا رہی ہے۔ ان کا کہنا تھا کہ نظرثانی درخواست پر عدالت جو بھی فیصلہ دے گی، حکومت اس پر عمل کرے گی۔

رانا ثناء اللہ نے کہا کہ ان کے خیال میں عمران خان کو سپریم کورٹ سے ملنے والا ریلیف قانون کے مطابق نہیں ہے، اسی لیے حکومت نے قانونی راستہ اختیار کرنے کا فیصلہ کیا ہے۔

نواز شریف کے علاج سے متعلق بات کرتے ہوئے انہوں نے کہا کہ سابق وزیراعظم کو نجی اسپتال کے بجائے سروسز اسپتال منتقل کیا گیا تھا۔ ان کے مطابق سروسز اسپتال کے ڈاکٹروں کی رپورٹ کے بعد نواز شریف کو بیرون ملک علاج کے لیے جانے کی اجازت ملی تھی۔

انہوں نے مزید کہا کہ حکومت نے اپوزیشن کو مذاکرات کی دعوت دے رکھی ہے اور اب حکومت اپوزیشن کے جواب کا انتظار کر رہی ہے۔

رانا ثناء اللہ کا کہنا تھا کہ حکومت سیاسی معاملات کو بات چیت کے ذریعے آگے بڑھانے کے لیے تیار ہے اور اپوزیشن کے جواب کے بعد آئندہ کا لائحہ عمل طے کیا جائے گا۔