چاغی میں کوئٹہ تفتان تجارتی روٹ پر مسلح افراد کی کارروائی، گاڑی نذرِ آتش، دو لوڈ گاڑیاں تحویل میں لے لیں

چاغی (نامہ نگار) پدگ چارسر کے مقام پر کوئٹہ تفتان تجارتی روٹ پر مسلح افراد نے مبینہ طور پر ایک تجارتی گاڑی کو نذرِ آتش کردیا جبکہ دو لوڈ گاڑیوں کو اپنی تحویل میں لے لیا۔

ذرائع کے مطابق واقعہ اس وقت پیش آیا جب مسلح افراد نے تجارتی روٹ پر موجود گاڑیوں کو روکا۔ اطلاعات کے مطابق ایک گاڑی نے مبینہ طور پر وہاں سے بھاگنے کی کوشش کی، جس پر مسلح افراد نے اسے آگ لگا دی۔

ذرائع کا کہنا ہے کہ واقعے کے دوران دو لوڈ گاڑیوں کو بھی مسلح افراد نے اپنی تحویل میں لے لیا۔ واقعے کے بعد علاقے میں تجارتی سرگرمیوں اور کوئٹہ تفتان روٹ پر سفر کرنے والے ٹرانسپورٹرز میں تشویش پائی جا رہی ہے۔

واقعے کے حوالے سے مزید تفصیلات اور سرکاری مؤقف تاحال سامنے نہیں آسکا۔ انتظامیہ اور متعلقہ اداروں کی جانب سے واقعے کی تحقیقات جاری ہیں۔