پیٹرولیم لیوی کیخلاف جماعت اسلامی کے چاروں صوبوں میں دھرنے دوسرے روز بھی جاری

کراچی: پیٹرولیم لیوی کے خلاف جماعت اسلامی کے چاروں صوبوں میں دھرنے دوسرے روز بھی جاری ہیں۔ لاہور میں وزیراعلیٰ ہاؤس جبکہ کراچی، پشاور اور کوئٹہ میں گورنر ہاؤسز کے باہر کارکنان احتجاج کر رہے ہیں۔

امیر جماعت اسلامی حافظ نعیم الرحمان نے لاہور میں پریس کانفرنس کرتے ہوئے کہا کہ مطالبات کی منظوری تک دھرنے پرامن انداز میں جاری رہیں گے۔ انہوں نے حکومت سے مطالبہ کیا کہ پیٹرول کی قیمت کم کرکے 225 روپے فی لیٹر مقرر کی جائے اور پیٹرولیم لیوی ختم کی جائے۔

حافظ نعیم الرحمان کا کہنا تھا کہ جماعت اسلامی عوام کے حقوق کی جنگ لڑ رہی ہے، حکومت آئی ایم ایف کے دباؤ کا بہانہ بنا کر عوام پر مہنگائی کا بوجھ ڈال رہی ہے۔ انہوں نے حکومتی کمیٹی کو دھرنے کے شرکا سے مذاکرات کے لیے لاہور آنے کی دعوت بھی دی۔

لاہور میں دھرنے کے باعث مال روڈ اور اطراف میں ٹریفک کی روانی متاثر ہوئی ہے جبکہ کراچی میں گورنر ہاؤس کے باہر احتجاج میں خواتین کی بڑی تعداد کی شرکت متوقع ہے۔

امیر جماعت اسلامی کراچی منعم ظفر نے بھی حکومت سے پیٹرول کی قیمتوں میں فوری کمی اور مہنگائی کا بوجھ کم کرنے کا مطالبہ کیا ہے۔