ٹیکسلا میں معروف ٹک ٹاکر عائشہ عرف گلمانہ فائرنگ سے جاں بحق، بہن زخمی

ٹیکسلا: اسلام آباد سے متصل ٹیکسلا کے علاقے جی ٹی روڈ بائی پاس کے قریب نامعلوم مسلح افراد کی فائرنگ سے معروف ٹک ٹاکر عائشہ عرف گلمانہ جاں بحق ہوگئیں، جبکہ ان کی 12 سالہ بہن شدید زخمی ہوگئی۔

پولیس کے مطابق 28 سالہ عائشہ اپنی چھوٹی بہن کے ہمراہ گاڑی (BWV-609) میں راولپنڈی جا رہی تھیں کہ مسلح افراد نے گاڑی روک کر فائرنگ کردی اور فرار ہوگئے۔

فائرنگ کے نتیجے میں عائشہ موقع پر جاں بحق ہوگئیں جبکہ زخمی بچی کو طبی امداد کے لیے پی آئی ایم ایس اسپتال اسلام آباد منتقل کردیا گیا۔ جاں بحق خاتون کی لاش پوسٹ مارٹم کے لیے ٹی ایچ کیو اسپتال ٹیکسلا منتقل کی گئی۔

پولیس حکام کے مطابق واقعے کی تحقیقات جاری ہیں اور ممکنہ وجوہات میں آن لائن تنازعات، سائبر ہراسانی اور ذاتی دشمنی سمیت تمام پہلوؤں کا جائزہ لیا جا رہا ہے۔

پولیس نے جائے وقوعہ سے شواہد اکٹھے کرکے ملزمان کی گرفتاری کے لیے کارروائی شروع کردی ہے۔