سکھر: موٹر وے پر مشترکہ کارروائی، بھاری مقدار میں جدید اسلحہ برآمد، دو مبینہ اسمگلر گرفتار

سکھر (رپورٹ اسلم سومرو)سکھر پولیس اور حساس ادارے نے مشترکہ کارروائی کرتے ہوئے موٹر وے پر اندرون سندھ میں جرائم پیشہ عناصر کو اسلحہ سپلائی کرنے کی مبینہ بڑی کوشش ناکام بنا دی۔ کارروائی کے دوران بھاری مقدار میں جدید اسلحہ اور ہزاروں گولیاں برآمد کر کے دو ملزمان کو گرفتار کر لیا گیا۔ایس ایس پی سکھر اظہر خان مغل کے مطابق یہ کارروائی پنوعاقل کے قریب موٹر وے پر خفیہ اطلاع کی بنیاد پر کی گئی، جہاں ایک مشکوک کار کو روک کر تلاشی لی گئی۔تلاشی کے دوران گاڑی سے 14 کلاشنکوف، 23 ٹی ٹی پستول، ایک شارٹ گن، متعدد میگزینز اور کلاشنکوف و پستول کی 15 ہزار سے زائد گولیاں برآمد ہوئیں۔پولیس نے موقع پر موجود دو مبینہ اسمگلروں، حمزہ پٹھان سکنہ اسلام آباد اور عبیداللہ پٹھان سکنہ کراچی کو گرفتار کر لیا۔ ابتدائی تفتیش کے حوالے سے ایس ایس پی سکھر کا کہنا ہے کہ ملزمان پشاور سے اسلحہ لا کر سکھر سمیت اندرون سندھ کے مختلف شہروں میں جرائم پیشہ افراد تک پہنچانے جا رہے تھے۔ایس ایس پی اظہر خان مغل نے بتایا کہ گرفتار ملزمان سے مزید تفتیش جاری ہے تاکہ اس منظم نیٹ ورک میں شامل دیگر سہولت کاروں اور مرکزی کرداروں کا سراغ لگایا جا سکے۔ انہوں نے کہا کہ قانون نافذ کرنے والے ادارے اسلحہ اسمگلنگ اور جرائم پیشہ گروہوں کے خلاف بلاامتیاز کارروائیاں جاری رکھے ہوئے ہیں اور کسی بھی صورت ایسے عناصر کو قانون کی گرفت سے بچنے نہیں دیا جائے گا۔پولیس حکام کے مطابق اس کامیاب کارروائی سے نہ صرف بھاری مقدار میں غیر قانونی اسلحہ جرائم پیشہ عناصر تک پہنچنے سے روک لیا گیا بلکہ ممکنہ سنگین جرائم کی روک تھام میں بھی اہم کامیابی حاصل ہوئی ہے۔حکام نے اس عزم کا اظہار کیا کہ شہریوں کے جان و مال کے تحفظ اور امن و امان کے قیام کے لیے اسلحہ اسمگلنگ میں ملوث افراد کے خلاف سخت کارروائیاں آئندہ بھی بلا تعطل جاری رہیں گی۔