جاپان: جھگڑے کے دوران خاتون نے ساتھی کے ہونٹ سوئی اور دھاگے سے سی دیے، ملزمہ گرفتار

ٹوکیو: جاپان میں گھریلو جھگڑے کا ایک انتہائی افسوسناک اور غیر معمولی واقعہ سامنے آیا ہے، جہاں ایک خاتون نے مبینہ طور پر اپنی ساتھی خاتون کے ہونٹ سوئی اور دھاگے سے سی دیے۔ پولیس نے ملزمہ کو گرفتار کر کے واقعے کی تحقیقات شروع کر دی ہیں۔

غیر ملکی میڈیا رپورٹس کے مطابق یہ واقعہ 29 جون کو ٹوکیو کے قریب واقع شہر کوگا میں پیش آیا۔ پولیس کے مطابق 42 سالہ متاثرہ خاتون اور 49 سالہ ملزمہ ماسائے ساکورائی ایک ہی گھر میں رہائش پذیر تھیں۔

ابتدائی تحقیقات کے مطابق دونوں خواتین کے درمیان معمولی بات پر جھگڑا ہوا، جو شدت اختیار کر گیا۔ الزام ہے کہ ملزمہ نے غصے میں آ کر سوئی اور دھاگے کی مدد سے متاثرہ خاتون کے ہونٹ سی دیے۔

پولیس کے مطابق زخمی خاتون کسی طرح گھر سے نکل کر قریبی دکان تک پہنچی، جہاں دکاندار نے اس کی حالت دیکھتے ہی پولیس اور امدادی ٹیم کو اطلاع دی۔ خاتون کو فوری طور پر اسپتال منتقل کیا گیا، جہاں اسے طبی امداد فراہم کی گئی۔

تحقیقاتی حکام کا کہنا ہے کہ جائے وقوعہ سے شواہد اکٹھے کرنے کے بعد ماسائے ساکورائی کو جسمانی حملے کے الزام میں گرفتار کر لیا گیا ہے۔

جاپانی سرکاری نشریاتی ادارے این ایچ کے (NHK) کے مطابق پولیس اس امکان کا بھی جائزہ لے رہی ہے کہ واقعے کے وقت گھر میں کوئی تیسرا شخص بھی موجود تھا، تاہم اس حوالے سے تاحال کوئی تصدیق نہیں ہو سکی۔

پولیس دونوں خواتین کے باہمی تعلقات، جھگڑے کی وجوہات اور دیگر پہلوؤں کی تفتیش کر رہی ہے۔ حکام کے مطابق تحقیقات مکمل ہونے کے بعد ملزمہ کے خلاف مزید قانونی کارروائی عمل میں لائی جائے گی