یکم جولائی سے مون سون بارشوں کا نیا سلسلہ، مختلف علاقوں میں سیلابی صورتحال کا خدشہ

کراچی: محکمہ موسمیات نے یکم جولائی سے ملک کے مختلف حصوں میں مون سون بارشوں کے نئے اسپیل کی پیشگوئی کرتے ہوئے شہریوں اور متعلقہ اداروں کو الرٹ رہنے کی ہدایت کی ہے۔ محکمہ کے مطابق بعض علاقوں میں تیز ہواؤں، گرج چمک، اربن فلڈنگ اور لینڈ سلائیڈنگ کا بھی خدشہ ہے۔

محکمہ موسمیات کے مطابق 30 جون کی شام یا رات سے مغربی ہواؤں کا نیا سلسلہ پاکستان میں داخل ہونے کا امکان ہے، جبکہ بحیرہ عرب سے آنے والی مرطوب ہوائیں ملک کے مشرقی اور وسطی علاقوں کو متاثر کر رہی ہیں۔ مزید برآں 2 جولائی سے خلیج بنگال سے مرطوب ہواؤں کا ایک اور سلسلہ بالائی علاقوں کا رخ کرے گا، جس سے بارشوں کی شدت میں اضافہ متوقع ہے۔

محکمہ موسمیات کا کہنا ہے کہ 3 اور 4 جولائی کو سندھ کے سکھر، جیکب آباد، لاڑکانہ اور گردونواح میں بارش کا امکان ہے، جبکہ یکم سے 4 جولائی کے دوران بلوچستان کے شمالی اور شمال مشرقی اضلاع میں بھی مون سون بارشیں متوقع ہیں۔