بلوچستان کے مسائل کا حل اتحاد، مکالمہ اور امن میں ہے، لشکر کشی کسی صورت حل نہیں، لشکری رئیسانی

سابق سینیٹر حاجی میر لشکری خان رئیسانی نے کہا ہے کہ بلوچستان پہلے ہی سنگین سماجی اور معاشی مسائل کا شکار ہے، ایسے میں کسی بھی قسم کی لشکر کشی یا تصادم کی سیاست مسائل کو حل کرنے کے بجائے مزید مشکلات پیدا کرتی ہے۔یہ بات انہوں نے پاکستان ٹیلی ویژن کے براہوی پروگرام میں شریک گفتگو کرتے ہوئے کی انہوں نے کہا کہ اس وقت ضرورت اس بات کی ہے کہ تمام سیاسی اور سماجی لوگ مل کر آگے بڑھیں۔ ان کے مطابق تقسیم، نفرت اور ٹکراؤ کی سیاست سے معاشرے کو نقصان پہنچتا ہے اور عام لوگوں کی مشکلات میں اضافہ ہوتا ہے۔ان کا کہنا تھا کہ آئین کے نام پر بعض اوقات غیر قانونی سرگرمیوں کی باتیں سامنے آتی ہیں، لیکن آئین میں واضح ہے کہ غیر قانونی اسلحہ اور مسلح سرگرمیوں کی کوئی گنجائش نہیں۔انہوں نے کہا کہ بلوچستان میں مختلف برادریاں آباد ہیں، جن میں بلوچ، پشتون، ہزارہ اور سیٹلر کمیونٹی شامل ہیں، اور سب کو ساتھ لے کر چلنا ہی اس خطے کے استحکام کی ضمانت ہے۔سابق سینیٹر نے مزید کہا کہ موجودہ حالات میں فیصلے جذبات کے بجائے سوچ سمجھ کر اور امن و بھائی چارے کے اصولوں کے مطابق ہونے چاہییں۔ان کے مطابق بلوچستان کو مزید مسائل کی طرف نہیں لے جانا چاہیے بلکہ اتحاد اور مکالمے کے ذریعے آگے بڑھنا ہی واحد راستہ ہے۔